Atuagaq ”Partisaani arnaq pinnersoq” kalaallit Nunaata allisuequtimi anigorlugit namminersulernissaanut siulittuutaasoq aasaq manna naqiterneqareerluni saqqummertoq maanna Tasersuup Atuarfiani, Nanortallip Atuarfiani aamma Narsap Atuarfiani, kiisalu Ammassivimmi atuarfimmi atuagaatigineqalerpoq.
-Nammineerlunga meeraagallarama atuarfitsinni atuagassaaleqisarnerput eqqaallugu atuakkiannik atuarfinnut tuniserusuttarpunga, neriuutigalugu atuartunit pissarsiffiulluni atuarneqarumaarnera, atuakkiortoq Kelly Berthelsen oqaluttuarpoq.
Atuagaq tunissutigineqartoq ”Partisaani arnaq pinnersoq” imarisamigut nunatsinni ajornartorsiutit assigiinngitsut qanoq qaangerneqarsinnaanerannik oqaluttuartumik imaqarpoq, oqaatsinillu aamma qanganisanngortunik oqaaseqatigiit ilaanni atuiffiulluni.
-Ukiuni kingullerni oqaatsinik qanganisanngortunik atuineq qaqutiguulersimammat atuartut annerit atuakkiannik atuarnermikkut pissarsiaqaatigissagaat neriuutigaara, taamatullu atuakkap imarisaani nunatsinni ajornartorsiutit assigiinngitsut qanoq qaangerneqarsinnaanerat pillugu atuakkami oqaluttuarineqartoq aamma inuusuttunit iluaqutigineqarsinnaajumaartoq neriuutigara. Taama oqarlunga atuakkami oqariartuut pingaarneq atuartussanut ingerlateqqikkusuppara ”Sulisinnaassuseq pingaaqaaq, suleqateqarsinnaassuserli tamanit pingaarneruvoq”, Kelly Berthelsen naggasiivoq.
Atuagaq ”Partisaani Arnaq Pinnersoq” Kelly Berthelsip nammineerluni atuakkiaasa aqqanilissaraat.