Narsami Henrik Lundip illuata silataani orniguttut nuannaartut nerilluarput.
- Tallimanngornermi oktobarip sisamaanni Narsami Permagreenip Henrik Lundip illua nutarterlugu naammassineranut atatillugu Narsami Katersugaasivik ilasseqatigiisitsivoq. Henrik Lundip illuata silataani ilasseqatigiisitsivugut illup qaliaa nutarterneqarsimasoq innuttaasunit isiginnaarneqarsinnaaniassammat. Taama Narsami Katersugaasiviup pisortaa, Jesper Stormly Enevoldsen oqaluttuarpoq.
- Aningaasaateqarfiit Sonning Fonden aamma Bygningsbevaringsfonden af 1975 tapersiinerisigut nutarterineq pivoq. Ilasseqatigiinnermi oqalugiartoqarlunilu nipilersuataartoqarpoq. Sunngiffimmi susassaqartitsisup Ivalo Motzfeldtip nerisassat kalaallillu kaagiat mamaqisut isumagai. Nivi Stidsen aamma Susanne Lynge aaqqissuussamut aamma ikiuupput. Inuit 50-it missaanniittut aaqqissuussamut ornigupput. Jesper Stormly Enevoldsen itisilerivoq.