Kommune ukiumut 35-40 mio. koruuninik sinneqartooruteqarfiusunik missingersuusiussaaq, tassa ingerlatsinermut aningaasartuutini 2024-mi atuinermiit 2025-mut missingersuutini ingerlatsinermut aningaasartuutit 45-50 mio. koruuninik appartinneqassapput, taavalu ukiuni 2026-miit 2030-mut tigoriaanagassatut atorallakkanik akilersuinissamut ukiumut 20 mio. koruunit nassaarineqartassallutik.
Stine Egede oqarpoq: ”Aningaasaqarnermik iluarseeqqinnissamut pilersaarusiaq kommunalbestyrelsip akuerimmagu nuannaarlungalu eqqissiallappunga. Ataatsimoorluta kommunip aningaasaqarneranik aaqqiiniaqatigiinnissarput pingaaruteqarpoq. Aningaasarparujussuit pineqarput, taakkulu angalanermut, meeqqanik inissiinermut pisiniarnermullu missingersuutinik appaanikkut ileqqaarutigineqassapput, kiisalu akissarsiatigut ileqqaarniartoqassalluni. Aaqqiissutissatut siunnersuummik sutigut tamatigut pisariillisaasoqarsinnaaneranik takutitsisumik saqqummiivigineqarpugut.
Borgmesteri Stine Egede siusinnerusukkut kommunip aningaasatigut ilungersunartorsiorneranik, tiguinnagassatut atukkat amerlisariaqalernerannut pissutaasunik ilisimatitsisareerpoq. Isumaginninnermut aningaasartuutit qaffannerat kiisalu Qaqortumi sulisunut inissianik pisisimaneq pisariaqartititsinermik ilaatigut kinguneqarput. Aningaasaqarnermik iluarseeqqinniarluni pilersaarusiap suliarineqarnerani paasinarsivoq missingersuutit atuinerlu oqimaaqatigiissinniarlugit ingerlatsivinni tamani ileqqaarnissaq pisariaqalersimasoq. Sanaartornermut missingersuutit ileqqaarniarfigineqannginnissaat Kommunalbestyrelsimit akuersissutigineqarpoq.
Stine Egede oqarpoq: ”Nutaanik inissialiornermut meeqqeriviliornermullu taarsigassarsinerup pingaarnersiuiffigineqarnissaanik pilersaarusiaq siorna Kommunalbestyrelsimit akuersissutigineqarpoq. Aningaasaqarnermik aqutsinerup allaqqunneqarsinnaanngitsumik kommunip sukaterineratigut neriuutigaarput inissialiornermut taarsigassarsineq pillugu pilersaarutitta piviusunngortinneqarsinnaanera”.
Stine Egede nangippoq: ”Qinigaaffik aallartillugu 2021-mi sippuerujussuarnissaq pinngitsoorniarlugu 37 mio. koruuninik nassaarniarsimavugut atorfinitsitsiunnaarneq pisiniartarnermillu unitsitsineq aqqutigalugit. 2022-mut missingersuutit akuerineqartussanngormata ileqqaarutissat 5,5 %-it nassaaraavut. Atorfinitsitsiunnaarnerput pisiniartarnermillu unitsitsinerput qaammatip siuliani atuutilersut maanna aningaasaqarniarnitsinnut sunniuteqalerput. Ajoraluartumilli taakku kisimiillutik kommunitsinni isertitanik aningaasartuutinillu oqimaaqatigiisitsilernissamut naammanngillat."
Stine Egede ima naggasiivoq: ”Kommunitsinni akiitsut aqaguinnarmut pilersimanngillat. Akiitsoqarnitsigut inissisimanerput 2021-mili ilisimareersimasuugutsigu, kiisalu aningaasaqarnermik aqutsissummut nutaamut ikaarsaarnerput iluatsilluarnerusimasuugutsigu, qularinngilara ullumikkut taama inississimalersimanavianngikkaluartugut. Maanna pisut aqunnialissavavut suliassaralu pingaarnerpaaq maanna tassaalerpoq kommunip aningaasaqarnera erseqqissumik qulaajassallugu, kiisalu naatsorsuutit 2022 aamma 2023-mut ukioq manna akuerineqartissallugit, taamaalillutik kommunalbestyrelsit nutaat kommunip aningaasaqarnerata qanoq issusianik takunnissinnaallualerniassammata.
Piffissami qaninnermi borgmesteri kommunemi aningaasaqarnermik killiffik pillugu innuttaasunut ataatsimiisitsinissani pilersaarutigaa.