Nunarsuaq tamakkerlugu imminut toquttarneq akiorniarlugu ullorititami, tassa septembarip qulinganni Narsami assassukkanik sungaartunik innuttaasunut agguaasoqarpoq.
-Narsami Inusullivimmi Yellow Septemberi malunnartinniarlugu suleqatiserinninnerput iluatsilluarpoq. Matumanimi imminut toquttarneq akiorniarlugu eqqartueqatigiinnertalimmik qalipaatinik sungaartortalinnik assassortitsisoqarpoq, assassukkallu taakku innuttaasunut agguaanneqarput tigulluarneqarlutillu, Kommune Kujallermi Narsami pitsaaliuisut sinnerlugit Nivi Stidsen oqaluttuarpoq.
Yellow September tassaavoq imminut toquttarneq akiorniarlugu pinaveersaartitsineq, ukioq manna Paarisamit siullermeerluni nunatsinni malunnartinneqartoq
Qalipaat sungaartoq inunnut isumatsassimanermik kiserliornermillu nalaataqartunut, eqqarsartaatsikkut ajornartorsiuteqartunut aammalu imminut toqunnissamik eqqarsaateqartunut neriunnermik oqariartuuteqartarmat qulequttamut qalipaasiunneqarsimasoq Paarisap nittartagaani atuarneqarsinnaavoq.