Ellenip ilinniartitsisunngorniarnerminut atatillugu ukioq 1982-83 Narsami suliffimmik misiliinermini maanna uini Carl Frederiksen naapippaa, ilinniartitsisutullullu 1984-imi inerami Qassiarsummi Ortooqqap Atuarfiani ilinniartitsisutut atorfiniffilluni.
Taamanerniit septembarip 30-anni 2024-mi soraarninngornissani tikillugu suliffimminut tunniusimalluni sulivoq, piffissami suliffigisamini ernini pingasut aamma ernutani ilaatigut atuartitarinikuullugit.
-Ellenip ukiuni 40-ni atuartitarpassui maanna inuiaqatigiinni qaffasissumik ilinniagaqarlutik akisussaaqataalernerat uppernarsaataavoq, Ellen ilinniartitsisuusoq pimoorussisoq ilikkarluartitsisorlu. Ilinniartitsisoq pimoorussisoq, atuartitsinermini pinngortitamik aallaaveqarnissamik pingaartitsisoq, pingortitarlu atuartitsiviup iluanut eqqullugu atuartitsinermik pikkoriffilik, Inerisaanermik Ingerlatsivimmi pisortap, Kattie Egede Motzfeldtip, Ellenip soraarninngorneranut atatillugu oqaaseqarnermini ilaatigut taama oqarpoq.
Ellen K. Frederiksenip ukiuni 40-ni ilinniartitsisutut sulinermini aamma piffissap ilaa annertooq pisortatut sulisarnermi saniatigut, ilinniaqqinnermini pikkorissarnerit atuartitsinermut atuarfimmilu aqutsinermut tunngasut assigiinngitsut ilinniarsimavai. Aamma 2004-mi Naturfagimi Pædagogisk Diplominalluni, 2014-imilu Almen Pædagogikkimi Masterinngorluni.
-Kommune Kujalleq sinnerlugu ukiorpassuarni tatiginartumik tunniusimallutit sulininnut qujangaarpunga, ukiuni aggersuni soraarninngorlutit soqutigisannik aallussilluarnissannik kissaatingaarpakkit, Kattie E. Motzfeldt oqarpoq.
Ataasinngornermi septembarip 30-anni, Ellen K. Frederiksen Qassiarsummi Ortooqqap Atuarfiani kusanartumik qujaniarfigineqarluni soraarninngorpoq.