2025-mi januaarip aallaqqaataaniit Qaqortumi Århusvejimi Kommune Kujalliup inissiaataani 13-iusuni najugallit ineqarnermut akiliutit saniatigut aserfallatsaaliinermut akiliisalissapput.
24. septembar 2024 kommunalbestyrelsi ataatsimiinnermini taama isumaqatigiissuteqarpoq.
Ineqarnermut akiliutit allanngortinneqartinnagit najugaqartut qaammatinik pingasunik siumut ilimasaarneqassapput.
2019 aamma 2024 akornanni aserfallatsaaliinermut aningaasartuutinik Kommune Kujalleq akiliisarsimavoq.
- Kommune Kujallermit akilerneqartarnissaannut missingersuuteqarsimanngilaq. Aserfallatsaaliinermut akileeqataassutissat 2024-mi aatsaat missingersuusiorneqarput. Maanna piginnittut peqatigiiffiat, Kommune Kujallermit peqataaffigineqartumik siulersuisoqaqqilerpoq, taamalu ataatsimeeqqittalerput taavalu illuummik piginnittumut, attartortut sinnerlugit aserfallatsaaliinermut akiliisartumut akiligassanik nassitsisalerlutik. Tamanna Avatangiisinut Ingerlatsiviup kommunalbestyrelsip ataatsmiinnerani suliamik saqqummiussissuaani takuneqarsinnaavoq.
Avatangiisinut Ingerlatsivik naliliivoq Kommune Kujalleq namminneq ingerlatsinermut aningaasaatini atorlugit attartortut aserfallatsaaliinermut akiligassaannik akiliussisarnerminik nangitsisinnaanngitsoq.