Pilersaarutit malillugit Qaqortumi iliveqarfitoqqami ilerrit ukiuni 50-inik sivisunerusumik piusimasut assallugit ataatsimoorussamut iliverneqarnissaat 2024-mi aasanerani pisussaagaluartoq aappagu aatsaat pisussanngorpoq.
Aasaq manna assaasoqannginneranut peqqutaavoq suliariumannittussarsiuussinermi neqeroortoqarsimannginnera, ukiumilu nutaami aatsaat suliariumannittussarsiuussisoqartussanngornera.
Iliveqarfitoqqami siunissami ilisinissanut inissaqarlualernissaa siunerataralugu assaasoqarnissaa pilersaarutaavoq, kingullermik 2016-imi assaasoqarnerani ataatsimoorussamik ilerrup sumiinnissaa taamani aalajangerneqarpoq.