Novembarip qaammataani 2022-mi Qaqortumi meeqqanut inuusuttunullu ornittakkamik pilersitsisoqarpoq, kingornalu 2023-p aallartinnerani Narsami aamma Nanortalimmi ornittakkanik pilersitsisoqarluni.
-Ornittakkat aqutsisuininngaanniit paasitinneqarpugut ornittakkat meeqqanut inuusuttunullu pitsaasumik sunniuteqartitsimasut, ornittakkammi pilersinneqarneranniit meeqqat inuusuttullu pinerluuteqarniartarnerat aserorterisarnerallu annikkilliallassimasoq maluginiarneqarsimavoq. Taarsiullugu amerlasuut peqqinnarnerusumik sammisartarlersimapput soorlu timersornerulerlutik, atuariaqqittalerlutik imaluunniit ilinniagaqarnikkut ingerlariaqqillutik, Kommune Kujallermi Inunnut Isumaginninnermi Ingerlatsivimmi pisortaq, Nielsine Petersen taama oqarpoq.
Aningaasarsiffinni ornittakkat ullut 14-ikkaarlugit ammasarput. Aningaasarsiffinni tallimanngornermi unnukkut qulingiluaniit ammartarput sapaammilu ullaakkut qulinut matusarlutik.
Ornittakkat illoqarfinni tamani pingasuni meeqqanit inuusuttuniillu ornigarneqarluartarput, ilaatigut illoqarfinnitamani katillugit meeqqat inuusuttullu 65-70-it tungaanut ornigussinnaasarlutik, agguaaqatigiissillugulu ornittakkami ataatsimi meqqat inuusuttullu tallimat unnuisarput.
-Ilaatigut ornittakkat aqutsisuinit saqqummiivigineqarninnit paasivara meeqqat timersorneq atorluartaraat, taakkunanilu meeqqat ilaat arsarnermi pissartanngorsimapput. Taamaattumik ornittakkat pitsaasumik sunniuteqarsimasut takuneqarsinnaavoq, meeqqat inuusuttullu peqqinnarnerusumik inooriaaseqalermata, inuusuttullu amerlanerusut efterskoleriartalersimallutik Nielsine Petersen oqarpoq.
Kommunip sullissisuisa meeqqat inuusuttullu immikkut pisariaqartitsisut ornittakkanut attaveqarluarnerulersimasut maluginiarpaat.