Kommune Kujallermi sapaatip akunnerisa 37-anni aatsitassarsiorneq pillugu saqqummersitsinermi, aatsitassarsiortut aamma inuussutissarsiuteqartut akunnerminni suleqatigiinnerunissaat aammalu aatsitassarsiorfiit pisariaqartitaasa innuttaasunik qanimut ilisimaneqarnerulernissaat siunertaapput.
-Aatsitassarsiorfiit neriunaateqarluartut ataatsimoortillugit suliffeqarfinnut innuttaasunullu saqqummiunneqarnerat iluarisimaarpara, aamma Nanortalimmi saqqummersitsisoqarnerani Majoriamit inuusuttut peqataanerat maluginiarpara nuannaarutigalugulu. Ataatsimut isigalugu saqqummersitsinermi suliffeqarfiit takkuttut amerlanerusinnaagaluarput, aatsitassarsiorfiimmi eqqarsaatigalugit suliffissat 500-t missaaniittut amerlanerpaat kommunitsinneersunik inuttalersorneqarnissaat kissatiginaqimmat, Kommune Kujallermi borgmesteri, Stine Egede aaqqissuussamut iluarisimaarinnilluni oqarpoq.
Saqqummersitsinermi aatsitassarsiorfiit neriunaateqarluartut tassa kultisiorfik Nalunaq (Amaroq Minerals), Amitsumi aqerluusassaqarfik (greenRoc Mining) aamma Killavaat Alannguanni aatsitassat qaqutigigoortut (Tanbreez Mining) innuttaasunut inuussutissarsiuteqartunullu saqqummiunneqarput.
-Aatsitassarsiorfiit pilersinniarnerini aamma tunisassiornerini aningaasat amerlasuut kaajalukaartinneqartarput. Taamaattumik Kommunimi sulisinnaasut suliffeqarfiillu sapinngisamik akuunissaat aningaasaqarniarnermut ineriartornermullu annertuumik sunniuteqarsinnaavoq. Angusaqarluarnissamut ilinniarneq suliassanullu piukkunnarsarneq aqqutissaapput, tamanna inunnut ataasiakkaanut suliffeqarfinnullu atuuppoq, Ujarassiooq aatsitassarsiornerlu pillugu saqqummersitsinermi aaqqissuusseqataasoq, Ole Christiansen oqarpoq nangillunilu…
-Soorlu Amitsumi aqerluusassaqarfiata sanaartornissaa 1 mia. kronenik naleqassanagatinneqarpoq, ukiut marluk iluanni pisussaq. Taamaattumik annertunerpaamik peqataaniarutta suut eqqumaffigissanerlugit piareersarnissamut piffissaavoq. Taamaattumik Kommunip suliniutaa ingerlaqqittariaqarpoq, inuiaqatigiinnut suliffeqarfinnullu iluaqutaasumik piareersarluni suliniuteqarnikkut, Ole Christiansen naggasiivoq.
Kommune Kujallermi pisuussutit uumaatsut amerlaqaat, matumani kommune suleqatigiissitaliorsimavoq periarfissanik nutaanik misissuisussanik. Ilisimasat nutaat iliuusissatut pilersaarusiornermut toqqammaviliisuussapput kingornalu suleqatigiinnissanik sullissinissanillu isumaqatigiissusiornivinnut toqqammaviliisuussallutik.
Aatsitassat piujuartitsinermik tunngaveqarluni atorneqarnissaat Kommunimit anguniagaavoq, tamatumalu saniatigut inuussutissarsiornikkut soqutigisat allat kommunip isumaginiartussaavai.