Qaqortumi atuariartortut angerlarsimaffiat novembarip qaammataani 2023-mi oqummik aallaaveqartumik matusariaqarnerata kingorna ataavartumik inissanik pissarsinissaq ajornatorsiutaasimavoq.
-Atuariartortut angerlarsimaffiata matusariaqalernerata kinguneranik atuartut 8-9 klassemi atuartut aggerfiinut angerlatittariaqarsimavagut, 10. klassillu misilitsittussaammata inissaannik ujartuiffigalugit. Piffissami siullermi Campusip ilinniartunut inissiaataani najugaqartissinnaasimavagut kingusinnerusukkullu Hotel Qaqortup inissiaataani marlunni najugaqartissimallugit. Tamannali ataavartumik ingerlasinnaasarsimanngilaq, Inerisaanermik Ingerlatsiviup pisortaa Kattie Egede Motzfeldt nassuiaalluni oqarpoq.
Hotelimimi najugaqartitsineq ullormut 3200 kronenik akeqartoq akisuvoq, akigitinneqartullu saniatigut inniminneereernikut inissittussanngoraangata anigallarnermi angerlatitsisarnerit aamma qaavatigut aningaasartuutaasarput.
-Ataavartumik najugaqartitsisinnaannginneq aaqqiiviginiarlugu INI a/s-p inissiaataanik attartorniarluta qinnuteqarsimavugut, taamaalillutalu inissiat nutarterneqarnikut iluatsinneranni utaqqiisaagallartumik ukioq atuarfiusoq 24/25 aamma 25/26 atuartut angerlarsimaffigigallagassaanik qulakkeerinnippugut, Kattie E. Motzfeldt oqarpoq.
Atuartut angerlarsimaffiata illumi ataasiinnarmiikkunnaarluni inissiani marlunni inississimalernera sulisut amerlisariaqarnerannik nassataqarpoq.
-Atuartut angerlarsimaffianni maanna najugaqartuutigut 9-10 klassimi atuartuusut toqqissisimasumik angerlasimaffeqarnissaat qulakkeerniarlugu sulisut nakkutiginnittussat amerlisimavagut, taakkumi aamma allatuulli toqqissimallutik angerlarsimanissaat qulakkiigassarigatsigut, atuartullu angerlarsimaffigisimasaata nutarterneqarnissaa siunertaralugu Avatangiisinut Ingerlatsivik suleqatigalugu aallartereerpugut, Kattie E. Motzfeldt oqarpoq.
Atuartut angerlarsimaffigisimasaata oqummik eqqugaasimasup nutarterneqarluni suliareqqinneqarnissaa pilersaarutaavoq, aningaasanillu attartornissamut akuersisoqariarpat kommunalbestyrelsimiit immikkut aningaasaliisoqarnissaa siunertaavoq.
Nutarterinissallu tungaanut maanna najugaqartitsineq utaqqiisaasumik blok H-mi inissiineruvoq.