Suliniummi nutaami kommunimi sulisut unamminermut qaammatit tamaasa peqataasinnaapput. Suliniummi nutaami inuunerinnerulernissaq anguniarlugu timikkut nukinnik atuisarnissaq siunertaavoq.
”Qarasaasiap saaniittaqaagut, tamannalu uippakajaarnermik ilaanni nassataqarsinnaasarpoq .” Najaaraq Jakobsen, Kommune Kujallermi pinaveersaartitsinermut immikkoortortami sulisuusoq oqarpoq.
Kommunip sulisui qaammatit tamaasa unammeqataasinnaapput, illoqarfinnilu pingasuni ajugaasut pingasuusinnaallutik; tassa Nanortalimmi, Qaqortumi Narsamilu. Illoqarfiit tamarmik ajugaasuni siulliusinnaapput, aappaasinnaallutik pingajuusinnaallutilluunniit, tamatuma kingorna illoqarfinni tamani ajunngitsorsiassanik assigiinngitsunik akissasisitsoqartassaaq. Illoqarfinni pineqartuni sulisut peqatigiiffiisa eqqugassat isumagisarpaat.
Isumassarsiaq tigulluarneqarpoq
Najaaraq Jakobsen kommunimi upernaaaq manna pinaveersaartitsinermut siunnersortitut sulilermat suliaq aallartippoq. Sulinerup nalaani timimik atuisarnissamik Najaaraq siunnersuuteqarpoq, juulillu qaammataani suliniutaa aallartereerpoq.
”Suliaq tassanngaannartorujussuuvoq” Najaaraq Jakobsen oqaluttuarpoq, oqarlunilu suliniutip aallartinnera pilertortorujussuarmik pisimasoq.
Najaaraq siusinnerusukkut politiiusimavoq, Nuummilu suliffigisimasamini sulisunut sammisaqartitsinermik misilittagaqalersimalluni.
Aallartilluarpoq
Qaammammi siullermi kommunimi sulisut amerlanerpaanik allorniutissapput, tassa Juulimi pisutta. Nanortalimmit peqataasoq ajugaavoq 429.884-inik allorsimalluni, Qaqortumik 496.829-inik allortoqarsimavoq, Narsamilu 343.373-inik allortoqarsimalluni.
Aggustimi unammissutissaq tassaavoq amerlanerpaanik airsquaternissaq annerpaamillu imernissaq. Unammisitsinermut tassunga peqataanissamut kommunimi sulisut suli periarfissaqarput.
”Suliniut decembarip tungaanut ingerlassaaq, massakkut qanoq ingerlanera takussavarput, neriuppungalu suliniut ingerlaavartunngorumaartoq soqutiginnittoqaannassasorlu." Najaaraq Jakobsen oqaluttuarpoq.