Akileraarutitigut akiitsoqartoqarneranut Stine Egedep patsisinik nasssuiaanermini oqaatigaa akileraarutinut A-nut akiliisarnermi periusissiamik allannguisoqarnerani ajoraluartumik kukkoqarsimasoq kiisalu amigartumik suliamik tunniussisoqarsimalluni, tamaalilluni akileraartutit A-t akilerneqarsimagatik. Ingerlatsivimmi akileraarutitigut akiitsoqarneq paasineqarmat anigaasanik tigoriaannaateqarneq ajornakusoorsimaffiuvoq taamaasilluni kommunep Akileraaruteqarnermut Aqutsisoqarfimmut akiitsut akilersimasinnaanagit.
Stine Egede oqarpoq: ”Innuttaasut qanoq ililluni akileraarutinut A-nut akiliinissamut puiguisoqarsinnaaneranik apeqqutilliinnerat paasilluarsinnaavara." Innutaasunut ajuusaarnerarlungalu utoqqatsereerpunga aammattaaq siumut ingerlariaqqinnissarput kissaatigara assingusumillu pisoqaqqinnginnissaa qulakkeerusullugu. Aningaasaqarnermut Ataatsimiititaliaq maannakkut akileraarutinik akiliisarneq pillugu ingerlaavartumik ilisimatinneqartarpoq. Tamakkiisumik akisussaaffik tigunikuuara."
Aningaasanik tigoriaanaateqarnerup ilungersunartuuneranut patsisaasut ilaat pillugit borgmester Stine Egedep nassuiaatigaa Kujallermi Illuutinut katillugit 30 mio koruuninik annertussusseqartumik karsimiit toqqaannartumik akiliisimaneq. Borgmesterip aammattaaq oqaatigaa kommune periarfissaq siulleq atorlugu inissianut aningaasanik atorniarnissamut pilersaartoq, aningaasanik tigoriaannarnik ilungersunartorsiortoqarneranut pitsanngorsaataasussamik.
Allanik peqquteqartumik aningaasanik tigoriaannarnik ilungersunartiorsortoqarnera pillugu kommunalbestyrelsi tigoriaannagassatut atorsinaasat 100 mio. kr.-nut qaffanneqarnissaannik aaalajangersimavoq, INI A/S aqqutigalugu inissianik attartornermut aningaasaliissutinik pissarsiat INI A/S-mut utertinneqarlutik, inissianik pitsaanerusumik aserfallatsaaliisoqarniassammat. Tamatuma saniatigut isumaginnittoqarfimmi 2023-mi atuinerusoqarnera peqqutaaqataavoq 2024-mi aamma atuisoqanerunissaa naatsorsuutigineqarluni, matumanilu akiligassanik nutaanngitsunik akiliinerit, kontomiit ulloq unnuarlu paarsivinnut akiligutigineqartartunut akiliinerit kiisalu siunnersortinut avataaneersunut aningaasartuutit kommunip aningaasaqarnerata ilungersunartorsiorneranut ilaatigut peqqutaaqataasuupput. Isumaginnittoqarfik iluarseeqqinnissamut pilersaarusiortoq Stine Egedep ilisimatitsissutigaa, ilaatigut ulloq unnuarlu paarsivinnut inissiisarnernik annikillisaallutik aammattaaq annertuumik siunnersortinik avaataaneersunik ikilisaanissaq pisariaqarsimavoq.
Stine Egede oqarpoq: ”Massakkut ukiumut aningaasat atugassanngortinneqartut malinniarlugit ingerlatsivinni annertuumik suliniuteqartoqarpoq, kukkunersiuisoq suleqatigalugu kommunip iluarseeqqinnissamut pilersaarutaa suliarileruttorparput Namminersorlutik Oqartussanut taarsigassarsiniarluni qinnuteqaasiornernissatsinnut”.
Stine Egede ima naggasiivoq: Sulisunut innuttaasunullu paasissutissat piviusut pillugit paasitinneqarnissaat pingaartippara. Taama pisoqarnerani kommunalbestyrelsip suleqatiginissaa aatsaat taama pingaaruteqartigaaq, innuttaasut tamanna kissaatigaat, aamma piumasaqartitsivoq innuttaasut akornanni eqqissisimanissaq pisariaqartoq anguniarlugu ataatsimoorluta suleqatigiinnissarput.