Aalisarnermut Piniarnermullu Naalakkersuisoqarfimmiit 2024-mi umimmattassat saqqummiunneqarput, paasinarsivorlu Nanortallip kangiani umimmaat 2024 taamaallaat pingasut pisassiissutigineqarsimasut.
4. marsi 2024 Kommune Kujalleq Pinngortitaleriffimmi nersutinik immikkut ilisimasalik ikiortigalugu qulimiguulimmik umimmannik kisitsinermik ingerlatsivoq. Kisitsinermi 149-rut naammattorneqarput.
Kisitsereernerup kingorna Pinngortitaleriffiup nalunaarusiornermuni inassutigaa angutivissat arnavissallu tamarmik immikkut tallimat pisarineqarsinnaasut, tassa 2024-imi katillugit qulit pisarineqarnissaat Pinngortitaleriffimmiit inassutigineqarpoq.
Inassuteqarneranni tunngavilersuutit ilagaat umimmaat amerliartorluarnissaanut aqutamik ilanngarneqartarnermikkut pitsaanerpaamik atugaqarlutik amerliartornissaat.
Ukioq manna Nanortalimmi piniartut ilaatigut naammattoorsimavaat piaraq siornalisaq immami toqungalluni puttasoq: Ilanngullugu angutivissat amerlaneri nalunaarutigaat. Tamanna aamma ukioq kisitsinermi takuneqarsinnaasimavoq.
Uagutsinnut paasinannginnerpaavoq sooq Naalakkersuisorqarfimmiit umimmaat pingasuinnaat pisarineqartussatut aalajangiunneqarsimanersut, naak Pinngortitaleriffimmiit inassutit, Kommunillu innersuusutai 2024 angutivissat arfineq marluk arnavissallu tallimat pisarineqassasut.
Ukioq manna aalisartut piniartullu ukiup affaa sikorsuarnit ajornartorsiortitallutik inuuniarnerat assorsuaq ilungersornartorsiorfiuvoq, taamaattumik allatigut isertaqarnissartik pisariaqartilluinnarpaat.
Taammaattumik Nalakkersuisutut qinnuigissavakkit Nanortallip kangiani umimmattassat minnerpaamik qulit pisarineqarnissaannik aalajangiissasutit.