Juulip qaammataata aallartisimalerneraniit Narsami qaqqaliarluni assigiinngitsunik qalipaasersuinissamut peqataanissaq meeqqanut inuusuttunullu neqeroorutaavoq.
-Meeqqanut inusuuttunullu qaqqani qalipaasersuinissamut neqerooruterput tigulluarneqarpoq, maannamullu qalipaasersuinerput nuannisarfiulluni peqataaffigineqarluarpoq, Oline Isaksen, Narsami ilaqutariit illuanni meeqqanut inuusuttunullu siunnersorti oqarpoq.
Aqqutit qalipaasersukkat Narsami katersugaasivik suleqatigalugu illoqarfiup assinganut ilanngunneqartussaapput.
-Aqqutinik assigiinnitsunik qalipaasersuineq sammisassaqartitsiniarneruvoq aammalu innuttaasut takornariallu qaqqaliarniartut atorluarluarsinnaasat. Aqqutimmi qalipaasersorneqartut Narsami katersugaasivik suleqatigalugu bykortimut ilanngunneqassapput, Oline Isaksen oqarpoq.
Qaqqaliarnermi aqqutinik qalipaasersuilluni ilisarnaatilersuineq juulip naanissaata tungaanut ingerlanneqassaaq, peqataarusuttullu klubbimut nalunaarlutik allatsissinnaapput.
Aqqutit qalipaasersorneqareersut qalipaasersorneqartussallu:
Tasiugaa, aqqut sungaartumik qalipaasersorneqarpoq.
Angakkorsartarfik, kuukasimmiit tunguusamik qalipaasersorneqarpoq.
Putorsuaq, Tasersuarmiit Tunguusamik qalipaasersorneqarpoq.
Kuannersuit, qorsummik qalipaasersorneqassapput.
Ilimmaasaq, Ilimmaasap ataaninngaannit aappaluttumik qalipaasersorneqassaaq.
Talut, qorsummik innartaalu aappaluttumik qalipaasersorneqassapput.
Narsap qaqqaa, qorsummik qalipaasersorneqassaaq.
Qaqqarsuaq, saavatigut aappaluttumik qalipanneqqassaaq, Tasiugaatalu tungaanut qorsummik qalipanneqassaluni.