Tallimanngornermi juulip ulluisa aqqaneq aappaanni Pipaluk Jakobsen Larsen aammaasoralugu qaannamik unammersuarneq pisortatigoortumik ammarneqarpoq.
- Qanga siulitta piniutaannik tammatsaaleeqataallusi timersuummik ingerlataqarnersi, timersortartutullu maligassiuisuunersi inuiaqatigiinnut isumaqaqaaq, naleqangaarlunilu. Taamaattumik periarfissaq manna iluatsillugu angajoqqaanut, sungiusaasunut, tapersersuisunullu tamanut timersuutip matuma ingerlanneqarneranut aqqutissiueqataasunut qujarusuppunga, tamassinnut qujanaq, Pipaluk Jakobsen Larsen ammaalluni oqaaseqarnermini ilaatigut taama oqarpoq.
Unammersuaarneq nunatta avannaannit Tunu ilanngullugu aamma USA-miit peqataaffigineqarpoq.
- Qanortoq timersuutersi aqqutigalugu ullut makku nuannaarnermik, ikinngutigiinnermik, angusaqarfiulluartumillu immersoqatigiiffigilluarisigittoq. Taama naatsunnguamik oqaaseqarlunga unammersuarneq pisortatigoortumik ammarpara, unammersuarluarisi, Pipaluk Jakobsen Larsen naggasiilluni taama oqarpoq.
Qaannamik unammersuarneq juulip 12-ianni aallartittoq juulip 19-iat ilanngullugu ingerlanneqassaaq.