Kunngikkut Igalikumi, Narsami Qassiarsummi, tikilluaqquneqarluarnertik qujamasuutigalugu inuulluaqqussuteqarput.
-Kunngikkut kujataanut tikeraarnerminni innuttaasunit kissalaartumik tikilluaqquneqarluarnertik nuannaarutigalugu qujamasuutigaat, tamannalu qujamasuutigalugu inuulluaqqusinerat tamanut ingerlateqqippara, borgmester Stine Egede oqarpoq.
Juuliip tallimaani kunngikkut kujataanut tikinneranni borgmesteri Stine Egede Igalikumi tikilluaqqusisuuvoq, tikilluaqqusilluni oqalugiaataa ataani atuarneqarsinnaavoq;
Asasakka Ataqqinartorsuaq Kunngi Frederik qulingat aamma ataqqinartorsuaq Dronning Mary
Kunngitut Droninngitullu pisortatigoortumik nunatsinnut tikeraarnissinni kujataanut tikinnissinni pilluaqqullussi tikilluaqqusinnaagassi nuannaarutigaara.
Nunatsinnut uummateqangaarnersi ilisarnaatissi ilagivaat, taamaattuunersilu pillugu maani Kalaallit Nunaanni nuannarinnitserpassuaqarpusi. Taamaattumik Kunngitut Droninngitullu nunatsinnut tikeraaqqaarnissinni tikitassinni tamani tikilluaqquneqangaarlusi ilassilluarneqarsimassasusi qularutiginngilara.
Pilersaarutaasimagaluarpoq kujataani tikeraarnissinni Qaqortumi tikilluaqqusinissara; pinngortitattali sikorsuaqarfiusartup pilersaarutit allanngortittariaqarsimavai, taamaalillunilu Kujataani Unescop nunarsuarmioqatigiinnut kingornussassaanut ilaasumi, avataangiiserissaaqisumilu tikilluaqquneqarnissarsi pisussanngorlugu.
Nunaqarfinnguatsinnut kusanangaartumut Itillimiit Igalikumut ingerlaarnissinni aqqusineq Kongevej atuarlugu pisullusiingerlaarpusi. Aqqusineq taanna 1952-imi Kunngip Frederiup qulingiluaata maanga Igalikumut tikeraarnermini aqqutigisimasaa taamaalilluni aappassaa kunngimit ingerlaarfigineqaqqippoq.
Ukiorparujussuit ingerlaneranni nunatsinni kunngikkormiunit tikeraartoqartarnitsinni Dronning Margrethep aappaa takujuartarsimasarput, aamma siusinnerusukkut maani nunaqarfimmeeqatigisimasarsi ullumikkut aamma eqqaamavara. Nunatsinni pinngortitaq immikkullaarilluinnartoq immersorfigereerlugu Danmarkimut uteqqeriarussi inuulluaqqussutiga apuukkumaarparsi.
Marluliaatissi Miniup Ivalollu Qaqortumi orpiuteqarfianni peqatigalusi orpimmik ikkussinissaagaluarput pilersaarutit allanngorneranni pisinnaajunnaarpoq, pisinnaajunnaaraluartorli orpiup ikkuneqarnissaa isumagineqarumaarpoq.
Orpiuteqarfimmi orpiit ukiut ingerlaneranni talliartorput, soorlu aamma meeqqasi peroriartortut. Periarfissaq manna iluatsillugu ernissi angajulliup kunngissatta Christiaap ilinniarnertuunngornerani pilluaqqungaarpassi.
Kujataani tikeraarnersi aallarnerlugu maani kangerlummi qorsuusumi, qaqqarsuarnik ungalusimasumi, immap saani, uumasut kiffaanngissuseqarlutik najugaanni nuannersumik misigisaqarluarnissassinnik kissaatingaarpassi.
Qujavunga nunatsinniinnissinni maani kommunitsinnut tikikkussussimagassi, qanortorlu siunissami tikeraartarnissinni nunatsinni pinngortitarput immikkuullarissoq najorlugu nukissanik aallerfigiuarisiuk.
Kujataani aasaq misigisaqarfigilluassagissi kissallusi, tikilluaqqoqqippassi.