Qaqortup Kommunia kingusinnersukkut Kommune Kujallinngortoq tassaavoq ukiuni 41-ni sulisimasup Kim Rosendahlip atorfeqarnermini ineriartorfigisimasaa, ukiorparujussuarnilu misilittagaqarfigereerlugu juulip 24-anni ilassinniffiusumik ataatsimoornermi inuulluaqqusaa.
-Oqartoqarsinnaalluarpoq kommunip aningaasaqarnera kaasarfimmiorigit. Ukiorparujussuarni misilittakkatit eqqaamallaqqinnerillu kommunimi iluaqutaallutik sunniuteqarluarnikuupput, suliammi assigiinngitsut aalajangiussallu pillugit ukiut arlallit uterlutit eqqaamasaqarsinnaasarputit, taamaattumik soraarninngorninni ”Hard disk”-imik annaasaqarpugut, Kommune Kujallermi aningaasaqarnermut pisortaaneq Arne Andersen, ilassinniffiusumik ataatsimoornermi Kimmimut oqaaseqarnermini ilaatigut taama oqarpoq.
Soraarninngortoq Kim Rosendahl 1983-imi ilinniartutut Qaqortup kommunerisimasaani aningaasaqarnermut immikkoortortaqarfimmi aallartippoq, kingorna naammassigami Inunnik Isumaginnittoqarfimmi allaffimmiunngorpoq, ukiullu sisamat tassaneereerluni Aningaasaqarnermut Ingerlatsivimmut uteqqippoq, ingerlatsivillu taanna soraarninngornissami tungaanut atorfeqarnermini ineriartorfigalugu.
Ingerlatsivimmi tassaniinnermini allaffimmiutut aallartippoq, kingorna akileraartarnermut nakkutilliisutut sulereerluni aningaasaqarnermut nakutilliisutut sulilerpoq, 2004-milu aningaasaqarnermut pisortanngornermini soraarninngornissani tikillugu tassaniilluni.
-Ukiorparujussuarni innuttaasunut politikerinillu sullissilluarsimanerit tulluusimaarutigisinnaalluarpat, soraarninngoraluartutilli piginnaasatit atorfissaqartilluaratsigit qaammatini tulliuttuni ulapinnitsinni ikiuunnissamut ammasinnaanerit neriuutigaara, tamannali illit nammininnguaq aalajangigassaraat, Arne Andersen oqaaseqarnermini oqarpoq imalu nangilluni…
- Kommune sinnerlugu ajunnginnerpaamik kissaappakkit, soraarninngornerit qanortoq atorluariuk, neriuppungalu peqqillutit Mogens peqatigalugu Qaqortup Kujataatalu nuannersuutinnerannut suli peqataassasutit, Arne Andersen naggasiivoq.