Inuiattut ullorsiornermut atatillugu Julie Jessen kulturikkut maligassiuilluni suliniuteqarluarsimasutut tallimanngornermi juulip 12-ianni nersornaammik tunineqarpoq.
-Ukiorpassuarni peqatigiiffilerinermik suliaqartarninni, aamma amernik mersortarninni suliarpassuannik, minnerunngitsumillu qajartortartut akuilisassaannik naqqaniit suliarinnillutit mersortarninni kulturitsinnik tammatsaaliueqataavutit. Taamaattumik kulturikkut maligassiuisutut nersornaatip ilinnut tunniunneqarnissaa inissaminiippoq, borgmester Stine Egede nersornaammik tunniussinermini ilaatigut taama oqarpoq.
Julie Jessenip nersornaammik tuninineqarnera persuarsiutaasumik Qaqortumi qinikkat ataatsimiittarfianni ataatsimoorfioreersoq, Miniup Ivalollu orpiuteqarfianni orpik Kunngip Dronningillu ikkutassaraluat, Julie Jessen peqatigalugu ikkunneqarpoq.