Isumaginnittoqarfimmi aningaasaqarnikkut nakkutilliinerup nukittorsarneqarnissaa ataatsimiititaliamit siullertut aalajangiunneqarpoq.
Aningaasanik tigoriaannaateqarnikkut ilungersunartorsiornermik malitseqartumik Qummumi sulisunut inissiat 22-t pisiarineqarsimanerannik ataatsimiititaliaq ilisimatinneqarpoq, ajornartorsiut taanna Kommunip inissiaatileqatigiiffiata Kujallermi Illuutit atorunnaarsinneqarnerata kingunerisaanik sanaartornermut aningaasartuutit kommunip aningaasaataaniit toqqaannartumik akiliisariaqalersimanermik aallaaveqarpoq.
Tamatuma saniatigut isumaginninnermi atuinerup ukiuni siuliini arfineq-marlunni 100 mio. koruuninik qaffariarsimanera naatsorsuutini ukiuni siuliineersunit utaqqiisaasunillu erserpoq. 2023-mut kisitsisaagallartutigut erserpoq isumaginnittoqarfimmi 30 mio. koruuninik sippuisoqarsimasoq. Tamatumani pingaartumik konto meeqqanut immikkut ittunik pisariaqartitaqartunut atorneqartartoq annerpaamik sippuiffiusimavoq.
- 2017-imiit kommunip isumaginninnermut atuinera 100 mio. koruuninik qaffariarsimavoq. Isumaginninnermi inatsisitigut pisussaaffiit assigiinngitsut arlallit, soorlu siusinaartumik pensionisiat kiisalu pingaartumik meeqqanut inuusuttuaqqanullu tunngasut, missingersuutitigut ilungersunartorsiortitsisuupput, taakkulu qanoq iliuuseqarfigissallugit kommune pisussaaffeqarpoq, Stine Egede oqarpoq.
Isumaginninnermi ukiuni kingullerni pingasuni suliniutit piviusunngortinneqarsimasut ilaatigut tassaapput orniguttarluni meeqqanut inuusuttuaqqanullu suliniutit, illoqarfinni pingasuni meeqqat inuusuttuaqqallu ornittagaannik pilersitsineq, ilaqutariit siunersioqatigiittarnerinik pilersitsineq, Qaqortumi Narsamilu qimarnguinnik tigusineq kiisalu Nanortalimmi nutaamik qimarnguiliorneq. Oqartussatut sulinerup nukittorsarneqarnissaa isumaginninnermut inatsisitsikkut piumasarineqalersimammat isumaginnittoqarfik siunnersortinik avataaneersunik suleqateqartariaqalersimavoq isumaginninnermi siunnersortinik kommunimut suliartortitsinerup ajornakusoornera pissutigalugu. Tamatuma saniatigut angerlarsimaffiup avataanut inissiisarnerit ikilisinniarlugit qassiinik iliuuseqartoqarpoq.
Ingerlatsivinni suliassaqarfinni tamani aningaasaqarnermik nakkutilliinerup nukittorsarneqarnissaa Aningaasaqarnermut ataatsimiititaliap ataatsimiinnermini akuersissutigaa. Siullertut, isumaginninermi annertusisamik nakkutilliinerit aqutsinerlu aallartinneqarput ilaatigut suliassaqarfiup taassuma ingerlatsivinni annerpaajunera aningaasatigullu ilungersunartorsiorfiunerpaajunera pissutigalugit.
-Aningaasaqarnikkut malinnaalluarsinnaalerumalluta atortorissaarummut aningaasaqarnermik aqutsissutaasumut nutaamut ikaarsaarnitsinnik akisunaarisimanerput nassuerutigisariaqarparput. Aningaasanik tigoriaannaateqarnikkut ajornartorsiut sunik pissuteqarnerinik Aningaasaqarnermut Ataatsimiititaliaq ataatsimut paasissutissinneqarpoq, ileqquusumillu ataatsimiinnermi tullermi sukumiinerusunik erseqqissaavigineqassalluni. Maanna pissutsinik qulaajaanikkut pissutsit qanoq issusiinik paasisimannillualernissarput pingaaruteqarpoq kiisalu suliassaqarfimmi oqimaannerpaami aningaasaqarneq sukanganerusumik nakkutigilertariaqarparput, taamatullu aamma aningaasaqarnermik suliaqarnermi piginnaasatigut qaffassaasoqartariaqarpoq, Stine Egede oqarpoq.
Aningaasaqarnermut ataatsimiititaliap juunip ulluisa 26-ianni ileqquusumik ataatsimiinnerani aningaasanik tigoriaanaateqassuseq pillugu paasissutissat sukumiinerusut kiisalu 2021-mut naatsorsuutit kukkunersiukkat saqqummiunneqassapput.
2022 aamma 2023-mut naatsorsuutit kukkunersiorneqarnerannut piffissaliussat aggustimi kukkunersiuisunik peqateqarluni sukumiisumik pilersaarusiorneqassapput. Kommunalbestyrelsi juunip ulluisa 27-ianni immikkut ittumik ataatsimiigiaqquneqassaaq.
Borgmester Stine Egede Nanortalimmi juulip aallaqqaataani, Narsami juulip aappaanni kiisalu Qaqortumi juulip ulluisa pingajuanni innuttaasunik ataatsimiititsissaaq.