Qaqortumi iliveqarfik K-1933-mi isikkamik arsartartut U11-t sapaammi saliillutik torersaareerneranni saligaalluinnarpoq, ulloq saliiffiusoq sialleraluartoq saliinermi peqataalluartoqarpoq.
-Iliveqarfimmi saliilluta torersaanerput nuannersumik ataatsimoorfiulluarluni ingerlavoq, ullorlu saliiffiusoq sialleraluartoq meeqqanit ilaqutaaniillu peqataasoqarluarnera nuanneqaaq qujanarlunilu. Ikioqatigiilluta iliveqarfimmik saliinerput iluatsilluarparput, Ulloriannguaq Kielsen K-1933-mi U11-nut sungiusaasuusoq oqarpoq.
Saliisut Danmarkimut Dana Cup-eriarnissaminnut aningaasanik katersiniarnerminnut atatillugu, Inerisaanermut Ingerlatsivimmi periarfissaq ‘Sammisassat arfinillit’ qinnuteqarfigalugu tapiiffigineqarput.
K-1933-mi arsartartut U11-t juulip 22-anniit 27-at ilanngullugu Dana Cup-imi unammisaqattaassapput.