John Rasmussenip toqukkut qimagunnerani nunatsinni minnerunngitsumillu Narsap kujataatalumi pinngortitaanik assiliisarnermigut nittarsaassilluarsimasumik annaasaqarpugut.
John Valbymeersoq sanasutut nunatsinnut tikippoq, 1968-imi 1969-milu Qaqortumi sulisareerluni 1970-mi aasakkut Narsami napparsimaviliornermi sulilerpoq, taamanerniillu Narsamut nuuppoq, toqussilu tikillugu najugaralugu.
1971-mi assiliisartutut aallartissimavoq, 1976-imilu inuuniutigalugu assiliisartutut namminersortunngorluni.
Narsami ukiorpassuarni najugaqarnermini Narsami inuunermik pinngortitaanillu nunatsinnut tamanut aammalumi nunatta avataanut nittarsaassiuartarnerani assiliineq piginnaanneqarfigalugu eqqumiitsuliortuunera takornartaanngilaq.
Ukiorpassuarni assilisarsimasani atorlugit Narsap kujataatalu nittarsaattuarneranut Kommune Kujallermiit qujaniarluta ukiup matuma aallartinneqani nersornaammik tunissuteqarfigaarput.
Johnip assilisarpassuarminik qimatsivigivaatigut, taakkulumi ilaat Narsami Katersugaasivimmut tunissutigisamasai qujamasuutissaraagut eriagisassagut.
John angutaavoq oqaloqateqarnissamik nuannarisalik, nipituuliortuunngikkaluarlunilu isummersortuartoq. Naapikkuminartartuunera oqaloqatikkuminartuuneralu nunaqqataasugut maqaasissaqaarput.
Johnip toqukkut qimagunnerani qimagaasut, qitornai, ernutai ernutaqqiutai qanigisaalu qamanngavik misiginneqatigingaarpakka.
John Rasmussenip eqqaaneqarnera ataqqinartuuli.
Kommunalbestyrelsi sinnerlugu,
Stine Egede, borgmesteri.