Ilinniarnertuunngortut ukiuni pingasuni ilinniarnertuunngorniareerlutik allagartaqalertut, assukkersorsimallutillu Campus Kujalliup inersuaani ataatsimoortut borgmesterimit Stine Egedemit oqalugiarfigineqarlutik pilluaqquneqarput.
- Maanna maaniippusi allagartaq ilinniagaqaqqinnissamut matuersaatissarsi pigilerlugu, qanortoq siunissami atorluarisiuk. Ilinniarnertuunngornermi immini tassaanngilaq ilinniagaqarneq tassaallunili ingerlariaqqiffissarpassuarnut ammaassisuusoq, ilissi minnerunngitsumillu inuiaqatigiit siunissami iluaqutigilerumaagassaat, Stine Egede oqalugiarnermini ilaatigut taama oqarpoq.
Ukiut tamaasa Kommune Kujalleq ilinniarnertuunngortut akornanni ilinniartitsisunit maluginiarluarneqarsimasumut legatimik 10.000 koruuninik aningaasartalimmik tunissuteqartarpoq. Ukioq mannalu kommunimiit legati Ivalo Lennertimut uteriilluni piumassuseqarluarlunilu ilinniarnertuunngortumut borgmesterimit tunniunneqarpoq.
-Siunissamik ajunnginnerpaanik angusaqarluarnissassannillu kissaallusi, aammalu nalliuttorsiorluarnissassinnik kissaallusi kommunalbestyrelsi sinnerlugu ilinniarnertuunngorlusi allagartartaarnissinni pilluaqqoqqippassi, Stine Egede pilluaqqusinermini naggasiilluni oqarpoq.
Ilinniarnertuunngortut 31-t sisamanngornermi juunip 20-anni allagartartaarput.