Asasakka ataqqinartut sulisartut, Sulisartut ulluanni pilluangaaritsi.
Sulisartuususi suliffippassuarni sullissinissigut inuiaqatigiinni napatitsisooqataanersi, ulluinnarnilu inuuniarnitsinni meerartatsinniit utoqqartagut ilanngullugit sullissinissinni assakaasunik ingerlatitsisuunersi pinngitsoorsinnaanngisarput ataqqinaatigaarsi.
Sulisartut ulluata pilersinneqarneraniit ukiorpanni atugassarititaasut pitsanngorsartuarneqarsimasut ullumikkut atugaraasi, akissaateqarniarnerli eqqarsaatigalugu nunarsuarmioqataanitsinni pisut ulluinnarni inuunitsinni kalluaasartut aqqutissinni naapittarpasi.
Ukiuni siuliini sorsuttoqarnerata kinguneranik aammalu coronap kingorna aningaasarsiornikkut nunarsuarmilu pissutsinik allanngueqataanerani nioqqutissat akitsornerat aamma piffissami kingullermi orsussap akitsornera aqqusaarpagut, pinngitsoqaratalu tamanna annerusumik minnerusumillu malugaarput.
Taamatut pisoqartillugu politikkeriusugut pisussaaffigaarput sulisartut akissaatimikkut atugaasa nalimmassarneqarnissaannut suliniuteqartuarnissaq. Taamaakkaluartorli politikkikkut suliniutaasunut utaqqiinnarata nammineerluta inuunitsinnik ilusilersuinissarput akisussaaffigaarput, politikkikkummi suliat piffissaq sivisooq atorlugu suliarineqarsinnaasarmata.
Taamaattumik utaqqiinnarani nammineq inooriaatsimik peqqinnartumik inuuneqarnissaq, angajoqqaatullu meeqqamullunniit akisussaasutut maligassiuiuarnissaq aqqutissaalluarpoq.Minnerunngitsumik peqqinnartumik inuuneqarnikkut maligassiuneq aammali ileqqaagaqarnikkut sillimmateqarneq.
Nalunngilara akissaateqarniarnikkut ilungersunartumik inissisimagaanni ileqqaagaqarniarnissaq inornarsinnaasoq, annikitsunnguamiilli amerliartortitsinikkut annertuunngortitsisoqarsinnaasar-mat, ileqqaagaqarnikkut meerartatsinnik maligassiuinissarput kaamattuutigerusuppara.
Taamaaliornikkut inuiaqatigiit imminnut pilersortut, pisortanillu isumalluuteqaratik nammineq inuusaaseqartut amerliartortissinnaagatsigit. Ileqqaagaqalaarnermi anguniagaqarusunnermik piumassuseqarnermik aamma aningaaserivinnut takussutissaasarpoq.
Ulluinnarnili inuiaqatigiit pitsaasumik naligiinnerusumillu atugassaqarnissaannut politikkeritut sulinitsinni tamat oqallinnerannut peqataajuarnissaq pingaaruteqarpoq, aamma sulisartut atugaat pillugit. Ukiuni siuliini Sulisartut ulluanni peqataaniarlunga aammali ataatsimeeqateqarniarlunga QSIP-mut saaffiginnissuteqartaraluarpunga, ajoraluartumik tikilluaqqusinermik qisuarfigineqarneq ajortunik.
Taamaammat periarfissaq manna iluatsillugu saaffigineqarnissamut naapeqateqarnissamullu ammajuarnera oqaatigerusuppara. Sulisartummi pillugit eqqartugassaqaqaagut.
Ataqqinartut sulisartut, kommunitsinni nunatsinnilu tamani sulisartuususi tamavissi ullorsiorluarisi.
Stine Egede, Kommune Kujallermi borgmesteri.