Nanortalimmi timersoqatigiiffik NBK ukiorpassuarni sungiusaasoqarnikkut aalaakkaasumik ingerlalluarpoq, ingerlalluarneratalu takussutissaasa ilaagaat ilaasortaasa pissartanngorniunnerni ujamminik angerlaassisarnerat, aamma ukioq manna pissartanngorniunnermi.
-Nanortalimmi sulorartartut ujamminik angerlaassinikut sungiusaasut tapersusuisullu naapisimaarneri nuannaarutigeqaara, kommunnitsinnimi maligassiuinerat, minnerunngitsumillu pissartanngorniunnermi kommunerput sinnerlugu takutitsilluarnerat nalitoqaat. Sulorartartut angusaannik pilluaqqoqqippakka siunissamilu angusarissaarluarnissaannik kissaallugit, borgmester Stine Egede oqarpoq.
NBK-mi unammisartut ilaat Dicky-John Thorsteinsen pissartanngorniunnermi nunarput sinnerlugu nunanut allanut unammisartunut toqqagaavoq.
-Ilulissani pissartanngorniunnermi kommunitsinneersumik nunarput sinnerlugu unammisartussamik toqqaasoqarnera tulluusimarutissaraarput, taamaattumik sungiusaasut nammineq kajumissutsiminnik suliaqartut minnerunngitsumillu angajoqqaat tapersersuinermikkut meerartatsinnut inuusuttortatsinnullu aqqutissiiuussisarnerannut qutsavigingaarpakka, Stine Egede oqarpoq.
Stine Egedep Nanortalimmi sulorartartut marlunngornermi apriilip 30-anni naapisimaarpai.
Nanortalimmi sulorartartut borgmesterimit naapinneqarput
Nanortalik Badminton Klubbimi unammisartut nunatsinni sulorartartut pissartanngorniunneranni ujaminnassimasut borgmesterip Nanortalimmiinnermini naapisimaarpai.
Udgivet d. 10. maj 2024