Sisamanngornermi apriilip 25-anni Nanortalimmi qatserisartut politiillu biilii siulersuisoralugit ingerlaaqati-giittoqarpoq.
-Ingerlaaqatigiinneq meeqqaniit utoqqaarniillu peqataaffigineqartoq nuannisarfiusumik ingerlavoq. Ingerlaaqatigiinneq atuartuniit, meeqqerivinniit tamanit aammalu utoqqarniit peqataaffigineqarluarluni iluatsippoq, Nanortalimmi pitsaaliuinermik siunnersortit sinnerlugit Marina Anthonsen oqaluttuarpoq.
Aalasa qulequtaralugu illoqarfimmi ingerlaaqatigiinneq malitseqartillugu amerlanerusut peqataanissaat anguniarneqassaaq.
-Aaqqissuussaq una ingerlaaqatigiiffiusoq siulliuvoq, tullissaanimullu taamatut aaqqissuusseqqinnissatsinnut aqutsisoqatigiiaanik pilersitsinissaq siunniupparput, taamalilluni ingerlaaqatigiit tunuleriiaarnerisa tulleriiaanissaat aqulluarneqarsinnaassammat. Tamatuma saniatigut peqataasut amerlanerunissaat qulaakkeerniarlugu suliniuteqassaagut. Matumani suliffeqarfiit amerlasuut peqataasinnaanissaat anguniagaralugu, siunertaammammi suna tamaat unitsilaarlugu ataatsimooqatigiinnissaq, Marina Anthonsen oqarpoq.
Aalasa qulequtaralugu ingerlaaqatigiinneq Nanortalimmi pitsaaliuinermi siunnersortit aaqqissuussaraat.