Asasakka meerannguit, ullumi nunarsuaq tamakkerlugu meeqqanut ulloritinneqartumi ullorsiornissinni pilluangaaritsi.
Angerlarsimaffik toqqissisimanartoq, kialaartoq, nerisassaqarfiulluni angajoqqaanit akisussaasutulluunniit paarsisunit isumaginnilluarfiusoq aamma soqutigisanik aallussinissamut toqqammaviliisoq meeqqatut pisariaqartippasi, pisinnaatitaaffigalugillu.
Pisinnaatitaaffigaarsi naamminerpiaasinnaanersi, kinaassusissinnik ilusilersuisinnaanersi, minnerunngitsumillu isummassinnik annissisinnaanersi oqarsinnaatitaanersilu.
Angajoqqaassili aamma akisussaaffigaat perorsaanerminni siunissarsi eqqarsaatigalugu akisussaaffimmik tigusisinnaallusi perornissassinnut aqqutissiuussinissartik.
Taamaammat oqaaqqissaarutit piumasaqaatillu ilaanni nuannernerpaasanngikkaluartut akisussaaffimmik tigusinissigut peqataaffigisarisigit, siunissamimi iluaqutigingaarumaarpasi.
Meeqqatut inuuneq kiffaanngissuserlu pigisarsi nuannersorpassuarnik misigisassaqarfiusoq ilaanni nuanniitsunik nalaataqarfiusinnaasarpoq, taamaattoqartillugu eqqaamagisiuk oqaasinnguiffigisinnaasassinnik aamma ikiuisinnaasunik saaffissaqartuaannarnera.
Sumilluunniimmi ajornartorsiuteqarussi angajoqqaasi, ilaquttasi, meeqqerisut, ilinniartitsisut, inersimasulluunniit tatigisasi meeraqatisiluunniit saaffigisinnaavasi.
Eqqaamassavarsi meeqqat tamarmik toqqissisimanartumik peroriartornissaat inersimasut tamarmik akisussaaffigimmassuk, inersimasummi inatsisitigut pisussaaffeqarput inoqatitsinnik ikiortarialinnik naammatuuinermi qisuariarnissamik.
Asanartut meeqqat, ullumi ulloq ilissinnut ullugitinneqartoq nuannersunik misigisaqarfiugilitoq.
Angajoqqaat, akisussaasullu allat, meeqqat ullussinni nuannaartitseqataallutik nuannersumik immersueqataanissaat neriutigalugu ullorsiornissinni pilluaqqoqqippassi.
Stine Egede, Kommune Kujallermi borgmesteri.