Sisamanngorneq apriilip 25-at tassaassaaq Nanotalimmi innuttaasut kikkulluunniit ataatsimoorlutik illoqarfimmi pisuttuaqatigiiffissaat.
-Aalasa qulequtaralugu illoqarfimmi ingerlaaqatigiinnissarput atuarfiup silataanniit nalunaaqutaq qulit qeqqaniit aallartissaaq, pisuttuaqatigiinnissamut suliffeqarfiit amerlasuut peqataanissaat neriuutigaarput, taamaassinnaappammi innuttaasut amerlanerpaat peqataasinnaammata, Nanortalimmi pitsaaliuinermik siunnersorti Sikkerninnguaq Petrussen, pitsaaliuisut sinnerlugit taama oqarpoq.
Aalasa qulequtaralugu Nanortalimmi pisuttuaqatigiilluni ingerlaaqatigiinnissaq Pinaveersaartitsinermi ataatsimiititaliap aaliangigaraa.
-Qilanaarpugut ingerlaaqatigiinnissamut, illoqarfitsinnimi aaqqissuussat tamaattut akuttupput. Taamaattumik amerlasuunik peqataaffigineqarluni nuannisarfiunissaa neriutigaara, Sikkerninnguaq Petrussen oqarpoq.
Ingerlaaqatigiinnermi politiit aamma qatserisartut biilii siuttuullutik ingerlaassapput.