Borgmesterip Stine Egedep Narsami sapaatit akunnerani apriilip 15-ianniit 19-iata tungaannut suliffeqarfiit namminersortut, aalisartut piniartullu, atorfillit kiisalu innuttaasut nuannersumik naapisimaarpai.
Qaqortoq mittarfittaarpat attaveqaatitigut ineriartorneq inuussutissarsiornermi ineriartornermut pingaaruteqassaqaaq.
-Qaqortup mittarfittaarnera ilutigalugu kujataani attaveqaatitigut sunniutissaa qilanaaraarput. Qassiilli naqissuserpaat mittarfissap takissusaa pingaaruteqartoq, tamannami takornarialerisunuinnaanngitsoq kisianni inuussutissarsiortunut allanut aamma sunniuteqarniassammat. Narsami aalisartut aalisakkanik nutaanik Europamut tuniniaavinnullu allanut avammut tunisisalerusupput, taamaasiornikkut avammut tunisisarnermi, soorlu suannik aalisakkanillu nalitusaataassaaq. Paasitippakka Naalakkersuisunut mittarfissap takissusaa pillugu saaffiginnissutinnik akissutinissamut noqqaasimagama, borgmester Stine Egede oqarpoq.
Namminersorluni suliniarneq kommunimik ineriartortitsinissamut pingaaruteqarpoq, amerlasuullu ilisimatitsipput Narsami takornarialerinikkut suliaminnik annertusisaanissamik pilersaaruteqartut.
-Kujataa immikkuullarissuuvoq takornarialerinermilu ineriartortitsinissamut misigititassarisinnaasagut amerlaqaat. Takornarialerinissamut piareersimanissaq ineriartussallugu pingaarpoq, takornarialerisut suleqatigiissapput taavalu aallarnisaasunik pitsaasumik siunnersuisinnaaneq atorluarneqarluni. Tamanna inerisassavarput, Stine Egede oqarpoq.
Ataatsimiinnerit ilaanni Narsami ulloq unnuarlu angerlarsimaffeqalernissamik kissaateqartoqarneranik oqariartuuteqartoqarpoq.
-Meeqqavut kommunimit ungasissorsuarmut aallarunnagit paasisinnaavara ilaquttat innuttaasullu kommunip ulloq unnuarlu angerlarsimaffeqalernissaanik kissaateqartut. Massakkut kommune Qaqortumi ulloq unnuarlu angerlarsimaffimmik ingerlalluartumik ingerlatsivoq, taamaammat meeqqatta kommunip avataanut inissinneqartannginnissaannik anguniagaqarnerput nangissavarput. Pingaarnerpaavorli angerlarsimaffiup avataanut inissiisarnerit pinaveersaarniarlugit kommunimi innuttaasut suliffeqarfiillu peqqinnartumik atornerluisuuffiunngitsumillu inuuneqarnissamut akisussaaffimmik tigusinissaat, Stine Egede oqarpoq.
Maanna sulisut inissai arfineq-pingasut nutarsarneqareerlutik piareersarneqarput, ilaalu iserterfigineqareerlutik. Kommunip sulisuinit ilaannit paarsinermut periarfissanut tunngatillugu aperisoqarpoq. Stine Egede neriorsuivoq paasiniassallugu meeqqerivinni inissat amerlineqarsinnaanersut, taamaasiornikkut meeqqerivimmiilernissamut utaqqisut massakkutuulli utaqqinatiginnginniassammat kiisalu angajoqqaat sukkanerusumik sulilersinnaaniassammata. Sulisut amerlassusiligaaneri pillugit ataatsimiititaliamut susassaqartumut apeqqutigineqassaaq.
-Kuannersuit pillugit nalornineq pissutigalugu Narsami aningaasaliinissamut kajuminneq aamma nalorninartumiippoq, taamaammat neriuppunga akuersaanngilluinnarnermut atatillugu Naalakkersuisut neriorsuutitik attatiinnassagaat, Stine Egede nassuiaavoq.