Sapaatip akunnerata 15-iat naggaserlugu arfininngornermi sapaammilu Kommune Kujallermi Ingerlatsivinni pisortat susassaqarfinnilu pisortat allannguinermi aqutsineq pillugu isumasioqatigiipput.
- Sulliffeqarfimmi allannguisoqartillugu pisortaanerit kisimik susassaqartuunngillat, taamaattumik pingaaruteqarpoq allannguinermi aqutsisut tamarmik akisussaaqataallutik peqataatinneqarnissaat. Isumasioqatigiinnermi ingerlatsivitsinni tamani anguniakkat aamma allannguisoqarnerani misilittakkagut sammisaralugit eqqartueqatigiippugut, allannguisoqartillugulu sulisunut sunniutigisinnaasaat aamma aqutsinitsinni eqqumaffigisassat pillugit ilinniartsinneqarluta, Kommune Kujallermi pisortaaneq Tine Pars oqarpoq.
Politikikkut aqunneqartumik suliffeqarfimmiikkaanni allannguinissamut sakkussat pisariaqarput, taakkulu pikkorissarnermi sammineqarput.
- 2021-mi kommunalbestyrelsip allaffissornermi allannguisoqarnissaanik kissaataat malillugu Kommune Kujallermi allaffisornerup iluani allannguinikuuvugut, maannalu ullumikkut killiffipput aallaavigalugu pisortat allanguinermi aqutsineq pillugu isumasioqatigiinnerat pissarsiffiusoq iluarisamaarpara, suliffeqarfiummi iluani anguniagassanik nutaanik aamma pilersitsiffiuvoq, Tine Pars oqarpoq.
Pikkorissarnermi Ingerlatsivinni pisortat aamma suliassaqarfinni assigiinngitsuni pisortat Qaqortup Katersortarfiani apriilip 13-ianni aamma 14-ianni isumasioqatigiipput.