Ingerlatsiviit ataatsimiititaliallu marsip 23-anni aamma 24-anni naapeqatigeeqqittussanngorput, matumani ulluinnarni suliniutinik sulianillu pitsaasunik ingerlataqareerlutik, suliat ataqatigiissarlugit qanoq suleqatigiissinnaaneq naapeqatigiinnermi oqallisigineqassalluni.
-Isumaginninnermi Pinaveersaartitsinermi Ingerlatsivitinni suliagut aamma Inerisaanermut Ingerlatsivimmi suliaat ataqatigiiffippassuaqarput. Suliniutillu taamaattut ataqatigiinnerusumik qanoq suleqatigiissutigisinnaanerigut naapeqatigiinnitsinni oqallisigissavagut, Isumaginninnermut pinaveersaartitsinermullu Ingerlatsiviup pisortaa Nielsine Petersen oqarpoq.
Naapeqatigiinnermi eqqartugassatut sammineqassapput sakkortuumik pisoqartillugu periutsit aamma ikioroornartoq pillugu iliuuseqarnissamut iliuusissamik pilersaarusiorneq.
-Naapeqatigiinnissamut qilanaarpugut, siunertaqaqatigiillunimi assaat amerlanerusut atorlugit suleqatigiinneq angusaqarnarnerusarpoq, Inerisaanermi Ingerlatsivimmi Pisortaq Kattie Egede Motzfeldt oqarpoq.
Ingerlatsiviit naapeqatigiinneranni malitseqartitseqqilluni eqqartuisoqassaaq, ilaatigut ilaqutariinnik aqqutissiuussilluni sullissinerit, siusinaartumik iliuuseqarluni suliniutit, Pinaveersaartitsisut suliniutai, meeqqat immikkut pisariaqartitsisut atuarfinni atuareernerullu kingorna ornittakkaniittut ataatsimoorluni qanoq suleqatigiiffigineqarsinnaaneri ilaatigut naapeqatigiinnermi sammineqaqqissallutik.