Kommunip allafia nutarterneqareerluni atorneqaqqilersoq silaannaarissisimaqisoq, nutaanik iigaqalerlunilu qaammarissisimaqisoq ulluni makkunani sulisunit iserfigineqallattaarpoq.
-Nanortalimmi allaffik 2022-mi oqoqarneranik aallaaveqartumik matuneqarmat kingorna nutarterneqarnissaanut suliariumannittussarsiornerit sanaartornerillu aallartipput, maannalu tassa nutarterneqareerluni oqoqarunnaarsimanera qulakkeerneqareersoq allaffik ammaanersiorneqartussanngorpoq, kommune Kujallermi Avatangiisinut Ingerlatsivimmi sanaartornermut teknikeri aamma nutarterinermut ataqatigiissaarisuusoq Lutti Knudsen oqarpoq.
Nutarterinerup 2023-mi novemberimi naammassineqarnissaa siunniunneqarnikuusimagaluartoq qarasaasianut ikkuffiit sarfallu aqqutaat ullutsinnut naleqqukkunnaarsimasut taarsersortariaqarmata nutarterineq ukioq manna 2024-mi naammassineqarpoq.
-Nanortalimmi kommunip allaffia sanasunit, ruujorilerisunit, innaallagialerisunit kiisalu qalipaasunit suliarineqareerluni oquerulluni naammassisoq sulisunit malugusuutigineqassaqaaq, nutarterneqartormi siusinnerusukkut isikkorisimasaminit qaamaneroqaaq silaannarisseqalunilu, Lutti Knudsen oqarpoq.
Nanortalimmi kommunip allaffini nutarterinermi, Nanortalik Tømrer- og Snedkerforretning ApS, Nanortalik VVS ApS, Arsarnerit A/S aamma NANVVS & MALER ApS suliarinnittuupput.