Februaarip arfernanni 2024 innuttaasut 60-it tungaannut amerlassusillit Nanortallip siunissaa pillugu innuttaasunik ataatsimiisitsisoqarnerani peqataapput. Kommunalbestyrelsip kissaataa malillugu Nanortallip Kommune Kujallermiit anerusunnera pillugu oqallitsitsinissamut borgmesteri innuttaasunik ataatsimiisitsinissamut aggersaavoq.
Aallaqqaasiullugu Stine Egede Kommune Kujallermiit anerusunnermut tunngatillugu tunngavilersuutinik aalajangersimasunik amigaateqarluni oqariartuutigaa, kiisalu kommunalbestyrelsip qanoq iliuuseqarnissaanik amigaateqarnersoq eqqartuerusulluni. Innuttaasut Kommune Kujallermiit anninissamut atsiornernik katersinermik aallarniisimasut peqataanngitsut paasinarsivoq.
Ataatsimiinnermi kommunemut tunngatillugu pingaartumik Nanortalik pillugu paasissutissat kisitsisitigullu takussutissat saqqummiunneqarput. Suliniutit kommunalbestyrelsip aallarnersimasai Nanortalimmut attuumassuteqarsinnaasut pillugit pappiaqqanik agguaasoqarpoq. Tamatuma kingorna apeqqarissaartoqarsinnaalluni.
Takkuttunit apeqqutit ilai ukununnga tunngapput:
- Meeqqat angerlarsimaffiup avataanut inissinneqartartut amerlassusaat taakkununngalu aningaasartuutit ikilisarneqarnissaat.
- Nanortalimmi kommunip allaffiani suliffimmik misiliisut amerlanerusut kissaatigineqarput.
- Kommunip qanoq namminersortut ikiorsinnaanerai, soorlu kommunip illuutiminik tuniniaanerani sannavissinermi.
- Piginnaasatigut ineriartorneq annertunerusoq aammalu suliassaqarfiit akimorlugit suleqatigiinneq annertunerusoq kissaatigineqarpoq.
- Umiarsuarnik takornariartaatinik takornariat qanoq pitsaanerusumik sullinneqarsinnaanerat aammalu takornariat suut pisiarerusuttarneraat annertunerusumik paasisaqarfigineqarusupput.
- Inuussutissarsiorfiit qaqugu sanaartorfigissaavigineqassanersut apeqqutigineqarpoq.
- Suliariumannittussarsiornissamut piumasaqaatit inuussutissarsiortunit nunaqavissunit iluaqutaanissaannut qulakkeerinninnissamut kissaateqarneq.
- Kommunimi akissarsiagissaartut Nanortalimmut Narsamullu qanoq siaruartigisinnaanersut.
Stine Egede kommunerujussuanngornerup kingorna allaffeqafimmi sulisut tungaatigut ineriartorneq qanoq issimanersoq misissussallugu neriorsuivoq.
-Innuttaasut naapillugit, apeqqutaat isumaallu tusarnaarlugit kiisalu qanoq misigisimanerannik paasisaqarneq nuannerpoq. Aqagu namminerisamik kommuneqalerusuttumik ataatsimiinnermi tusagaqanngilanga. Tusaavarali kommunimi meeqqanut inuusuttunullu suliassaqarfimmi suliatigut aallartissimasat iluarineqartut, tamannalu tillinniarnernik serlersaarinernillu annikillisaataasoq. ISG-p suliai pillugit aammalu akileraarutit apparneqarnerat pillugit ilorrisimaartut oqariartuutigineqarpoq. Soorunami aamma suut qanoq iliuuseqarfigineqarnissaannik siunnersuutinik amerlasuunik tusarpunga, borgmester Stine Egede oqarpoq.
GlNanortalik pillugu paasissutissat 06022024