Feruaarip puingajuat aamma sisamaat Narsap atuarfiani nissiaraliornermik pikkorissaasoqarnerani arnat qulit pikkorissarnermut peqataapput, taakku ilagaat Ivalo Motzfeldt.
-Pikkorissarneq pissarsiaqarfigilluarlugu peqataaffigaara, ullunimi marlunni nissiaraliornermik pikkorissarnitsinni ilikkagaqaqaagut, pikkorissaqataasoq Ivalo Motzfeldt oqarpoq.
Nissiaraliornermik pikkorissartut ulluni marlunni naqqaniik nissiaraliornermik pikkorissartinneqarput, pisariitsuinnaasimanngilarlu.
-Nissiaraliornermik pikkorissarnitsinni nissiaqqat naqqaniit suliarineri pisariunaaqaara. Ilusilersorneraningaanniimmi atisalersorlugu naammassinissaata tungaanut suliarinera sivisuvoq, Ivalo Motzfeldt oqaluttuarpoq.
Nissiaraliorluni pisariitsuinnaanngikkaluartoq, juullillu qaammataa suli ungasikkaluartoq suliat juullimut qilanaalersitsipput.
-Juulli suli ungasittoq juullerpaluttunik suliaqarluni eqqumiilaaraluartoq juullimut qilanaarneq misiginarpoq, suliagulli pisariitsuinnaanngimmata nissiaralioqqinnissamut suli piffissaqarluarpoq, Ivalo Motzfeldt juullimut erinisulereersoq oqarpoq.
Petrine Thomsen Qaqortumeersoq kommuni kujalleq suleqatigalugu Narsami pikkorissaasuuvoq.