Assiliisartoq John Rasmussen nersornaaserneqarpoq
John Rasmussen ukiorpassuarni Narsami eqqaanilu assiliisarsimanera pillugu sisamanngornermi februaarip aallaqaataani, Narsami innuttaasut illuanni Kommune Kujallermiit nersornaaserneqarpoq.
Nersornaat borgmester Stine Egede sinnerlugu, Angutitsiaq Isbosethsenimit (kommunalbestyrelsimi ilaasortaq) tunniunneqartoq ima oqaasertaqarpoq:
”Ukiorpassuarni assilisatit atorlugit Narsap nittarsaattuartarneranut qujanaq, qujanarlu assilisannik kommunimut katersugaasivimmullu tunniussannut. Assiliinermik piginnaaneqarluarputit, assilisatimmi amerlasuuniit nuannaarutaasarput, illoqarfiillu kusanarnersaasa ilaanni inuunerup qanoq iluseqarneranik ersersitsisarlutik. Suleqatigiilluarsimanitsinnut tamanut qujanaq.”