Savat amii arlaqartut tarajorterlugit uninngatinneqarput, kingornalu qassanneqarlutik. Ammit qassanneqariikkat errortoqqissaarneqareeramik errorneqarput, erroreermatalu innerneqarlutik.
- Savap amii sisamat naqqaniit suliaraakka, ammit erroreermata qisunnut illuaqqallu iigaanut qassappagut piareermatalu meeqqat peqatigalugit illaariarlugit saniiarpagut, Meeqqerivik Narsamiutami inimi aqutsisoq Thilda Thomsen oqarpoq.
Permagreenimi sanasut qisunnik amerlanngitsunik innerinermi atorluarsinnaasunik tunniussipput. Savap amii meeqqat assassornerminni assigiinngitsutigut atortarpaat.
- Pinnguarnerni soorlu uummasuusaarnermi, siniffeeqqatut, nissimaaliornermi umitut nasatullu meqqutut atortarpaat assigiinngitsutigullu savat meqqui atorluaqaarput. Meeqqeriviit allat uagutsitut atorluaallutik meeqqanut sammisaqarneq taammatut ingerlassinnaavaagaat kaammattuutiginaqaaq, Thilda Thomsen oqarpoq.
Neqi A/S-ip ammit 20-it missaaniittut tunniussaat sinneqarluarmata Narsami sanaluttartunut tunniunneqarput.