Takornarialerisutut allagartartaartut katillutik 24-it Qaanaamiit Nanortalik tikillugu Qaqortumi ilinniagartik naammassillugu allagartartaarneranni Kommune Kujalliup Borgmesteriata pilluaqqullugit oqalugiarfigai.
- Siunissamut aggersumut kujataata takornariaqarfissuanngornissaanut siunnerfigisatsinnut isumalluarpunga; kujataatami avatangiiserisaa kusanangaartoq UNESCO-p nunarsuarmioqatigiit kingornussassanut allattorsimaffiani ilanngummalli nunarsuarmioqatigiinnit soqutigineqarnera annertusiartuinnavippoq. Takornarialerinermillu suliaqarnissigut nunatta nittarsaannissaanut oqaluttuarinissaanullu ilinniarnersi tunuliaqutaralugu periarfissaqarluarpusi, Borgmester Stine Egede oqarpoq.
Adventure Guidetut ilinniagaqalersut ilinniarnermi nalaani Kangerlussuarmi Qaqortumilu sulillutillu paasisassarsiorsimapput. Takornariartitsinermi Serviceøkonomitut ilinniagaqalersut ilinniarnermi nalaani Pituffimmi, Ilulissani, Qeqertalimmi, Nuummilu ilaatigut sulillutillu paasisassarsiorsimapput.