Sila aperujussuartillugu ulloq unnuarlu aputaajaanerit ingerlanneqartarput. Siullertut biilit ingerlavissai aputaajaasut arlariinngolutik illoqarfik tamakkerlugu aputaajaallutik ingerlattarpaat, malinnaasinnaaleraanngamillu aqquserngit silillillugit suliarisarpaat.
Aput nakkaanerata nalaani aqquserngit siorarterneqarneq ajorput.
- Apitillugu aqquserngit siorartersinnaaneq ajorpagut, sioqqat ingerlaannaq appunneqartarmata. Apitillugu pisuinnaat aqqutaani silami sulisugut ullaangarniit nivallutik aallartittarput, illoqarfiullu iluani aputaajaanermi suliffeqarfinnik suleqateqarpugut taakku sumiiffiit ilai akisussaaffigaat aputaajassallugit, Teknikkimut Avatangiisinullu ingerlatsivimmi ingerlatsinermut pisortaq Pâlo Kûiste oqarpoq.
Illoqarfiup iluani aputaajaasarnerit suliffeqarfiit ilaasa akisussaaffigaat, taammatuttaarlu utoqqaaqqat eqqaasa aputaajartarneri a/s ini-p akisussaaffigalugit.
Sila apitillugu aqqutigissaanermi paasissutissiineq
Kommune Kujallermi illoqarfinni nunaqarfinnilu silami sulisut silap qanoq issusia malillugu sulinertik ingerlattarpaat.
Udgivet d. 02. november 2023