Peqatigiiffiit ataatsimut naapeqatigiittut
Narsami peqatigiiffiit illoqarfimminni uummarissaaniarlutik kattullutik suliniuteqalerput.
Allattoq: Narsami Najukkami Ataatsimiititaliaq sinnerlugu, Aili Liimakka Laue
Coronap kinguneranik, politikkikkullu aaqqissuussaanermi kommunerujussuanngornerup kingunerisaanik minnerunngitsumillu Kuannersuit ammarniarneqarneranik, suliniut oqallinnerlu Narsami siuarsaanissamut kajumissuseqartunut uninngatitseqataalluinnarsimapput.
Siuarsaaniarnerigaluit, suliniutit pilersitsiniarnerillu ajornakusoortarnikuupput
unittooriartuinnarsimallutillu.
Tamanna mumisinniarlugu Narsami najukkami ataatsimiititaliaq aaqqissuussipput 4. aamma 5.november.
Narsami peqatigiiffiit isumasioqatigiinnertalimmik pikkorissartillugit.
Peqataasut peqatigiiffinniik aallartitat 20-t tungaannut peqataapput ilaatigut
peqatigiiffiliorusullutik kajumittut aamma peqataallutik.
Narsami peqatigiiffiit pikkorissarnerminni ilaatigut suliniutinik aaqqissuineq, aningaasanik qinnuteqaasiorneq missingersuusiornerlu pikkorissarfigivaat.
Isumasioqatigiinnermi suliniutinik suleqatigiiffigisinnaasaminnik pilersitsipput, Isumassarsiallu ilaat maannangaaq aaqqissuullugit pilersaarusiorlugillu aallartereerpaat.
Meeqqanut inuusuttunullu susassaqartitsinernik ilaatigut imaqarput, soorlu sammisassaqartitsinerit aamma illoqarfimmi meeqqaniit utoqqarnut peqataaffigineqarsinnaasunik ataavartumik pinngortitameeqatigiittarnissaq suliniutinut ilaalluni.
Suliniutit marluk kikkunnilluunniit peqataaffigineqarsinnaasut ilaatigut ersarissut ukuupput:
Aasaq 2024 Kujataa Cup ingerlanneqarnerani aliikkusersoqatigiinnertalimmik aaqqissuussinissaq pilersaarusiorneqarpoq.
Upernaaq 2024 pisussap aappaa tassaalluni Nunavut, Canadamiit Venezuelamiillu arnat inuusuttut marluk tikissammata kulturilu pillugu pikkorissaassallutik. Soorlu; qilaatersorneq, torlorsorneq, qullermik ikitsineq saniatigullu marluullutik nunasiaataasimanerup kingunerisai pillugit, kinaassuseq pillugu nunallu inoqqaavisa pisinnaatitaaffii pillugit, inuusuttunut pikkorissaassapput.
Peqatigiiffiit neriupput piviusunngortinnissaat tamakkiisumik iluatsilluarumaartoq.
Udgivet d. 06. november 2023