Kommune Kujallermi Kommunalbestyrelsip 2024-mut missingersuutit oqaluuseralugillu akuersissutigai, taamaalillunilu isertitassat 665 mio. kr. kiisalu aningaasartuutissat 650,7 mio. kr.-it missingersuusiorneqarput. Tassalu 2024-mi 14.3 mio. kr.-inik sinneqartooruteqarnissaq missingersuusiorneqarpoq. Kommunimut akileraarutip 1%-mik, tassa 28%-miit 27%-mut, appartinneqartinneqarnissaa missingersuutinut ilanngunneqarpoq.
Sanaartornermut aningaasaliissutissat eqqarsaatigalugit Qaqortumi Qummumi sanaartorfigissaaneq, Nanortalimmi paaqqinittarfiliorneq, illoqarfinni nunaqarfinnilu qassiini iliveqarfinnik alliliinerit, Nanortalimmi kuuffilersuineq kiisalu Qaqortumi aqqusinernik asfalterineq Kommunalbestyrelsimit pingaarnerutillugit aningaasaliiffigineqarput. Ingerlatsineq eqqarsaatigalugu qatserisartut pikkorissarneqarnissaat teknikkimut ataatsimiititaliamit pingaarnerutillugu aningaasaliiffigineqarpoq.
Kiisalu borgmesteri suliniutinut tulliuttunut atugassanik kommuninut taarsigassarsisitsisarfimmiit taarsigassarsiniarnissamik qinnuteqaatinik pilersaarusiornissamut Kommunalbestyrelsimit piginnaatinneqarpoq: Qaqortumi paaqqinnittarifk, Qaqortumi utoqqarnut inissiat kiisalu Narsami Nanortalimmilu sulisunut inissiat. Aammattaaq nutaamik Qaqortumi kommunip allaffiliornerup pitsaaqqutitaanik misissuisoqarnissaa tamatumalu qanoq aningaasalersorneqarnissaanik misissuisoqarnissaa kommunalbestyrelsimit noqqaassutigineqarpoq.
Suliffeqarfiiit Inerisaanermut ataatsimiititaliap ataaniittut, soorlu atuarfiit, paaqqinnittarfiit, kulturilerisut sunngiffimmilu sammisassaqartitsisut kiisalu Majoriaq aqutsisuinik piginnaanngorsaanissamut aningaasaliinissaq ataatsimiititaliami suliassani pingaarnerutinneqarput.
Timersortarfiit pinnguartarfiillu nutarterneqarnerisa suliassani sallinngortinniarneqarnissaannik 2024-imi pilersaarusiortoqassasoq Kommunalbestyrelsimit isumaqatigiissutigineqarpoq.
Isumaginnittoqarfik eqqarsaatigalugu meeqqat inuusuttuaqqallu siusinaartumik suliniarfigineqarnerisa nukittorsarneqarnerinut aningaasanik amerlanerusunik atugassanngortitsisoqarpoq kiisalu innarluutillit atugaat pitsanngorsarneqassallutik.
Borgmesteri Stine Egede ima oqarpoq: ”Ilaasortat tamarmik akileraarutip appartinneqarnissaanut isumaqataanerat, pitsaanerusumik ingerlatsinerup kiisalu kommunitsinni siusinaartumik iliuuseqartarnissap taama annertutigisumik isiginiarneqarnerat assorsuaq nuannaarutigaakka ”.