Borgmesterip Stine Egedep sapaatit akunnera 43-mi Narsamiinnermini sukisaarsaartarfimmi Majoriamilu inuusuttut, utoqqaat illuanni utoqqaat kiisalu Utoqqaat ornittagaannik atuisut, pisortat paaqqutarinninnerup suliassaqarfianni sulisut il. il. peqatigalugit ataatsimiinnerit qassiit pipput.
Ataatsimiinnerit annermik suliassaqarfiit paasisaqarfiginissaannik imaqarput; matumani qanoq suleqatigiittoqartarnersoq, qanoq illoqarfimmi akimut suleqatigiinnerit pitsanngorsarneqarsinnaanersut.
”Aaqqissugaasumik akulikitsumillu attaveqaqatigiinneq aammalu ingerlatsiviit akornanni suleqatigiinneq aallaavigalugit uagut kommunitut innuttaasumut suliffeqarfinnullu sullissilluarsinnaavugut. Suliassaqarfiit ilaanni akulikitsumik sulisut taarseraattarput, pingaartumik paaqqutarinninnerup tungaatigut, tassanilu ilisimavarput ukiuni aggersuni ilungersunarsiartuaartussaasoq. Suleqatigiinneq, oqaloqatigiinneq piginnaasanik qaffassaanerit kiisalu sulisutsinnut suliffigissaanerit siunissaq eqqarsaatigalugu aalluttariaqarpagut.
Utoqqaat ornittagaata atorneqartarneranut isumaqatigiissut nutarterneqassaaq, borgmesterilu Stine Egede isumaqatigiissummi sammissassanik peqqinnartunik imaqarnissaa kissaatigaa bingo taamaallaat sammineqarani.
Unnuit marluk malitsigiisillugit borgmesteri sukisaarsaartarfimmiippoq inuusuttut sammisaqaqatigalugit, inuusuttullu siunissami angorusutaat pillugit eqqartueqatigalugit.
”Inuusuttut naapisimaareerlugit inuusuttortannguatta inuunerminnik aallartisaaleruttortut pillugit nuannaarneq qamuunalu neriulluarneq misigalugit ingerlavunga. Inersimasut aamma inuusuttortatsinnut sullissisut, nukissatik piffissartillu ataqatigiinnermut peqqinnartumut atuisut qujamasuutigeqaakka.
Stine Egede aamma Neqi A/S-ip pisortaa Majoriarlu ataatsimeeqatigai, tassani toqoraanerup nalaani sulisussaqarnermut qaninnerusumik suleqatigiinneq eqqartorneqarluni. Tamarmiullutik suleqatigiinnerup pitsanngorsarnissaanut isumaqatigiipput, taakkartorneqartuni suliat qanoq ittuunerinik ilisimasaqarnerusoqarnissaa aammalu piginnaasaqarnerusoqarnissaa isumaqatigiissutaallutik.
Borgmesteri Stine Egede ukiumut marloriarluni sapaatit akunnera Narsamiittassalluni aamma Nanortalimmiittassalluni aalajangerpoq. Sapaatit akunnerani 44-mi Nanortalimmiinnissaraluaq silap ajornera pissutigalugu kingusinnerusumut kinguartinneqarpoq.