Ataatsimiititaliami ilaasortat aamma atorfilittat aningaasaqarneq pillugu isumasioqatigiinneq ingerlatereermassuk ullup aappassaanni aappaagussamut aningaasanik missingersuutit aalajangersorpaat.
- Aningaasaqarneq patajaatsumik ingerlanneqartoq paasissutissiissutigineqarmat tamanit iluarisimaarneqarpoq. Angerlarsimaffiup avataanut inissiisarnermi, angerlartitsinissamut suligasuartussanik suliniutit aallunneqassasut, taamatuttaaq innarluutillit annertunerusumik sammineqarnissaat kissaatinut ilanngunneqarput. Angerlarsimaffimmi ikiorteqartitsineq aaqqissuunneqaqqissaaq pitsanngorsarneqaqqillunilu. Isumaginninnermut attuummassutillit tamarmik pingaaruteqartut ingerlassapput, Isumaginninnermut Pinaveersaartitsinermullu ataatsimiititaliami siulittaasoq Sofia Olesen oqarpoq.
Isumaginninnermut Pinaveersaartitsinermullu Ingerlatsiviup iluani suliassaaleqisanngeqaat taamaammallu aappaagussamut pilersaarutit ilai aallarnisareersut aningaasartassai aamma missingersorneqarput.
- Ingerlatsivitsinni aningaasat pisariaqartitagut amerlapput, taamaakkaluartorli pingaarnersiuinitsinni erserpoq suut ineriartortitsinermi aaqqissusseqqinnernilu salliutissanerigut, suliassaqarfiit akisussaaffiillu nalilersoqqillugit taamaasilluta ingerlatsivitsinni aappaagussamut aningaasanut missingersuut piareerparput, Isumaginninnermut Pinaveersaartitsinermullu Ingerlatsivimmi pisortaq Nielsine Petersenoqarpoq.