Qaqortumi aalisartut piniartullu oqaluffiup eqqaaniittumut imaani ajunaarsimasunut eqqaassutissamut ingerlaaqatigiipput. Aalisartut piniartullu peqatigiiffiata siulittaasua Jens Peter Kielsen suleqatiminut pilluaqqusilluni, mianersortarnissaannik, aallannginnerminnilu piareersarluartaqqullugit oqaaseqarpoq. Aammattaaq inuusuttunnguit avannaani imaani ajunaarnikkut annaasat minutsimik ataatsimik nipaallisimallutik eqqaaniarneqarput.
Kommune Kujallermi borgmesterip aalisartut piniartullu pilluaqquai.
- Asasakka ataqqinartut aalisartut piniartullu ullorsiornissinni qamannga pilluaqqungaarpassi. Inuussutissarsiutersi pinngitsoorsinnaanngilarput, ukioq kaajallallugu inuussutissaqartippatsigut pitsassuarnik. Ukiorpassuarni imarsuaq suliffissi imaanaanngitsoq ajoraluartumik amerlasuunik aamma annaasaqarfiusimavoq. Paarilluartarisi, borgmesteri Stine Egede oqarpoq.
Pingasunngornermi novembarip ulluisa 15-anni aalisartut piniartullu ullorsiornerminni oqaluffiup tungaanut pisoqatigiipput, Kommune Kujallermi borgmesterip ilassillugillu pilluaqquai. Taamaaseriarlutik oqaluffiup silataaniittoq eqqaassutissaq naasortalerpaat, tassani immami ajunaarsimasut eqqaaniarlugit tussiaqatigiipput. Kingorna ulloq malunnartinniarlugu fabrikkip sutortarfianni ullaakkorsioqatigiillutillu sutoqatigiipput.