Kommune Kujalleq Qaqortumi atorfilinnut tamanut suliffimmi uippakajaarneq, suliffimmi attaveqaqatigiinneq, tarnikkut ikiueqqaarneq aamma kinguaassiutitigut innimiilliorneq pissaanermillu atornerluineq qulequtaralugit workshopinik neqerooruteqarput.
- Sullivimmi avatangiisit pitsaasut anguniagaraarput, avatangiisillu timikkut tarnikkuugaluarpalluuniit pitsaasuunissaat pingaartipparput, tamaammat workshopernerit tarnip pissusianik ilisimasalimmiit ikiorteqarluta aallartippavut, Kommune Kujallermi Akissarsianut Sulisoqarnermullu pisortaq, Jacob Abelsen oqarpoq.
Workshopinut peqataarusulluni nalunaartoqarluarpoq aamma illoqarfinni allani periarfissiisoqarsinnaanersoq ujartorneqarpoq.
- Workshopini tamani peqataasinnaasut 20-usarput, taakkulu inissat tamakkerlutik allattittoqaqattaarpoq, ilaallu utaqqisunut inissittariaqarsimavagut. Kommunip illoqarfiini allani assinganik neqerooruteqarsinnaanerput misissuiffigaarput, neriullutalu iluatsikkumaartoq, Jacob Abelsen oqarpoq.
Suliffimmi uippakajaarneq aamma suliffimmi attaveqaqatigiinneq ingerlanneqareermata, tarnikkut ikiueqqaarneq aamma kinguaassiutitigut innimiilliorneq pissaanermillu atornerluineq pillugit sapaatit akunnerini tulliuttuni workshopertoqassaaq.