Nanortalimmi siusinaartumik iliuuseqarneq, meeqqanut inuusuttunullu sullissisut aamma pitsaaliuinermik suliallit ataatsimut allaffeqalerput. Allaffik saniatigut sapaatip akunnerata naanerani akissarsiffiusuni illu ornittagaq immikkut ammatinneqartarpoq, taamaasilluni meeqqat inuusuttullu ornittagaattut aamma atorneqartarluni.
- Maani sullissisut qanillinerani suliat qanimut sullinneqarsinnaanerulerneri malunnarpoq. Pitsaaliunermik suliallit illoqatigilernikuuarput naak suliagut assigiinngissuteqaraluartut, arlaatigut suleqatigiisinnaasarpugut, Ilaqutariinnut siunnersorti Gertrud Geisler oqarpoq.
Nanortalimmi kommunip allaffissua siornatigulli aserfallakkiartorluni silaannaluttarlunilu suliffigiuminaallisimammat, immikkoortortat ukiuni kingullerni immikkoortiterlutik allaffeqartiterput. Illu atorluarsinnaasoq kommunip illuutigilermagu inunnik isumaginnittoqarfiup atorluaqaa.
- Maani ilaqutariinnut, meeqqanut inuusuttunullu pitsaaliuinermilu suliaqartullu eqqissilluta suliaqarsinnaalerpugut. Malunnartumillu ilaqutariinnit, meeqqanit inuusuttuniillu atorluarneqarnerulerpoq, massakkummi aamma illu iseruminarmat atorluaqaarput, isersimaartarfeqarluni, oqaloqatiginnittarfeqarluni iggaveqarlunilu pimmat iluareqaarput, Ilaqutariinnut siunnersorti Gertrud Geisler oqarpoq.
Nanortalimmi Ilaqutariinnut Sullissiviup inersuaa susassaqartitsinermi, aaqissuusinerni ataatsimiinernilu assigiinngitsuni atorluartassagitsik Gertrud Geislerip ilanngullugu aamma oqaatigaa.