Borgmester Stine Egede: Qaqortumi mittarfissaq 1799 meterinngoreeruni inuiaqatigiinnut akilersinnaanerpaassaaq

Qaqortumi mittarfissaq suliarineqalermalli malinnaaffigisimavara, suliarinnittullu Pennecon ingerlalluarnerat takullugu eqqarsarnanngitsuunngilaq qanoq akeqassagaluarnersoq suliarinnittut suli aallannginnerini, 1799 meterimut tallineqassagaluarpat.
Tamanna misissortissimavarput, missingiutigineqartullu inornartorsuunnginneri paasinarmat Angallannermut Naalakkersuisumut saaffiginnissutigaara. Naalakkersuisup Qaqortumiinnerani, KAIR aamma aningaasaqarnermi ataatimiititaliami partiit sinniisaasa peqataaffigisaannik Naalakkersuisoq ataatimeeqatigaarput.
Angallannermut Naalakkersuisup isuma paasilluarpaa, suliarlu angerlaallugu misissorumavaa.

Aasaq manna Københavnip Narsarsuullu akornanni ilaasut, juunimi 65 %-mik kiisalu juuli aamma aggustimi 20 %-nik amerleriarput. Siunissami Nuuk aqqutigalugu aasaanerani angallattussat amerliartuinnartussaapput. Qularnanngitsumimmi aamma Nuup Københavnillu akornanni angallattut ikiliartornavianngillat. Taamaattumik kujataani angallanneq siunissamut qularnaartareertariaqartoq isumaqarpugut. Maanna mittarfiliortut atortuutitik nassarlugit aallareerpata, ukiullu qassiugaluarnersut qaangiuppata tallinissaanik suliaqartitsisoqassappat aningaasartuutaasussat annertunerujussuanngortussaassasut naatsorsoruminarpoq.