Narsarsuarmi illu B-30, ullumikkut Mittarfeqarfiit A/S-imit atorneqartoq, akiliutitaqanngitsumik Kommune Kujallermut tunniunneqarnissaa Ineqarnermut Attaveqaasersuutinullu Naalakkersuisup akueraa. Illuut allaffeqarfittut, nutaaliorfittullu atorusullugu Kommune Kujallermi kommunalbestyrelsip ataatsimiinnermini illuut tigussallugu kissaatigisimavaat.
Qaqortumi mittarfittaassap atulerneratigut mittarfik qulimiguulinnut mittarfinngortinneqarpat, Narsarsuarmi inuussutissarsiutitigut ineriartortitsinissamut periarfissat misissorneqarnerinut atatillugu Narsarsuarmi nutaaliorfimmik pilersitsisoqarnissaanik Innovation South Greenland siornatigut kissaateqarnikuuvoq. Siunertamut tassunga B-30 piukkullugu oqaatigineqarnikuuvoq.
Narsarsuarmi aallarnisaaniartunut pitsaasunik atugassaqartitsinissaq, Innovation South Greenland naapertorlugu Narsarsuarmi nutaaliorfimmik pilersitsinissaq siunertaavoq.
Taassumap saniatigut ilisimatusarfiit ininik attartornissaminnut soqutiginnipput, taakkualu illorsuarmik ininik attartorsinnaassallutik.
Mittarfeqarfiit A/S-ip manna tikillugu illuummik allaffeqarfittut atuisup ilisimatitsissutigaa, allaffeqarfiit terminaleqarfimmi ataatsimoortinneqartussaammata B-30 atortussaajunnaarlugu.
Naalakkersuisoq Erik Jensen ima oqarpoq:
”Mittarfeqarfiit Narsarsuarmi illuutaasa ilaat Kommune Kujallermut tunniussinnaagatsigu nuannaarutigaara. Taamaalilluni Narsarsuarmi inuussutissarsiorneq pitsaanerusunik atugassaqalernissaanut, siunissami periarfissagissaarnerunissamut tapertaassalluni.”
Borgmester Stine Egede ima oqarpoq:
”Illuut siunertanut assigiinngitsunut atorusunneqalereermat, Narsarsuarmi inuussutissarsiornerup, ilisimatusarnerullu ingerlatiinnarneqarnissaannut illuut atorneqarsinnaammat nuannerpoq”.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl