Kalaallit Nunaanni angutit inersimasut isikkamik arsaallutik unammersuarnerat 2023
Kalaallit Nunaanni Isikkamik arsarluni silami pissartanngorniunnermut avataaniit peqataajartortusi G44 Qeqertarsuaq, B67 Nuuk, IT79 Nuuk, N45 Paamiut, E54 Tasiusaq, dommerit KAK siulersuisut Qaqortumut kujataanullu tikilluaritsi. K33 Qaqortoq aaqqissuisuusut ukiuni 90-inngortorsiornissinni pilluaritsi. Pissartanngorniunnerullu pisinnaalersimaneranut suleqataasimasusi tamassi qujanaq. Tikeraat isiginnaariallu tamassi tikilluaritsi. Neriuppunga kujataaniinnissinni nuannisarumaartusi puijunaatsunillu misigisaqarumaartusi.
Ulluni tulliuttuni silaqqittussaagatta qularutiginngilara isiginnaariartoqarluartarumaartoq. Neriuppungalu tamatta nuannisartinneqarluarumaartugut.
Uggornaraluaqisumik klubbet unammersuarnerni peqataasussaagaluit ilaat pisinnaajunnaartut eqqaamavagut.
Ukiorpassuanngorput kingullermik maani arsaatarfimmi unammersuarnernik ingerlatsisoqarmat. Taamaattumik neriuppunga siunissami unammiuaartarnerit aamma kujataani annertusiartoqqilerumaartut, meeqqani inuusuttuni inersimasuni utoqqasaanilu. Arsaatarfiit pilersitaasimasut atorluaqqunaqaat.
Maanna arsarfiup sammivia allanngorsimalluni, aammalu pujoralannarunnaarluni unammiffigissallugu nuannerluinnartumi unammisussanngorpusi. Tassalu oqaluttuarisaanermut ilannguttussanngorpusi.Nunatsinni unammersuarnerni siullerpaallusi maani ajugaaniuttussanngorassi. Pissanganaallak kikkut siullerpaallutik pissartanngorfigiumaarneraat.
Immikkut qujaffigerusuppakka isiginnaartarfiliornermi suliffeqarfiit illoqarfitsinni peqatigiilluarlutik tapiisimasut, minnerunngitsumik nammineq kajumissutsiminnik sanaqataallutik suliaqarsimasut. Ikioqatigiinnerut pilersissinnaasaasa killeqannginnerannik uppernarsaavusi. Qanortoq kajumissusersi ingerlajuarili.
Ippassaaninnguaq taartissanut issiasarfik qulisaq ajoraluaqisumik ikuallappoq. Suligasuartoqarneratigulli sananeqaqqipallappoq. Suligasuarsimasut tamassi qujanaq.
Unammersuarnerit neriuppunga torersumik ingerlanneqarumaartut. Inuusuttunut meeqqanullu maligassiuisuugassi nuannaartorineqarlusilu takutitsilluarnissarsi kissaatiginaqaaq.
Minnerunngitsumik kissaappassi tamassi peqqillusi ajoqusertoqarnasi unammersuarnerit naammassiumaarissi.
Unammersuarnerit naammassisimaleriarpata angerlamut apuulluarisilu.
Taamannak oqaaseqarlunga Kalaallit Nunaanni silami arsaalluni angutit inersimasut 2023-mi unammersuarnerat pisortatigoortumik ammarpara.
Unammilluarisi