Naak Nanortalimmi sila nalaatsorluni sapaatip akunnerani pitsaavallaanngikkaluartoq atuarfimmi sammisassat taamaatiinarneqanngillat, nukarlerni, akullerni angajullernilu atuartut tamarmik kippartartumik pulaartoqarlutik oqaluttuarfigineqarput. Natsersuarnik pilinermi panersiiviliortoqarpoq, ululiortoqarpoq, ersisaarutiliortoqarpoq, anaggavinnik sanasoqarpoq, qapiarfiliortoqarpoq kammiorfiliortoqarlunilu.
- Atuartunut ilinniartitsisunullu sapaatip akunnera pissarsiffiulluarpoq, naak ilaatigut natsersuarmik nammineq pilinissaagaluaq kipparsimaffimmullu angalanissaagaluaq sila sikullu peqqutaallutik pinngitsooraluartut. Atuartut nammineq natsersuarmik pilallutillu pilinngitsoorput, kipparsimaffimmut angalasoqanngitsoorpoq, taamaakkaluartorli sapaatip akunnera paasisaqarfiulluarpoq Nanortallip Atuarfianni pisortaagallartoq Vivi Kleist oqarpoq.
Silami killuliorluni natsersuarmik igasoqanngitsoormat naggataarnersiornermi atuarfimmi natsersuaq assigiinngitsunngorlugu iganeqarpoq. Taamaalilluni misilinneqarsinnaallutik, Natsersuaq suaasalik, qajulik, siaasagaq gullashiliaq.
Kulturi tammatsaaliorniarlugu kippartarneq pilisarnerlu Nanortallip Atuarfianni sammineqartalissasut siornaak angajoqqaaniit siunnersuutigineqarmat, ilinniartitsisuniit kommunalbestyrelsiniillu akuerineqarluni 2021-imi atuarfimmi ilikkagassatut anguniakkanut ilanngunneqarpoq.