Kujataani Nakuusaaqqat aallartisarneranni ilaasortat ilaata Aqqaluk Hard 14-inik ukiullip Qaqortumeersup, inuiattut ullorsiornermi oqalugiaataa tusarnaartunit tigulluarneqaqisoq ima oqaasertaqarpoq:
Tamassi inuiattut ullorsiornitsinni pilluaritsi
Nakuusaaqqamiit meeqqat oqartussaaqataanerat pingaartipparput, pingaartipparput meeqqat nunaminni illoqarfimminni, nunaqarfimminni sumiikkaluarunik ataqqineqarlutik isummersorsinnaatitaanissaat.
Tamatta kinaassuseqarpugut, inuit tamatta kinaassuserput assigiinngillat.
Isikkugut assigiinngillat, timigut assigiinngitsuupput ilai angisuupput ilaallu mikisuullutik. Sumiiffinnit assigiinngitsuneersuuvugut, ilai nunaqarfinneersuupput ilai illoqarfimmeersuupput ilaallu savaateqarfinneersuullutik, allaammi ilai nunanit allaneersuupput. Ilaquttagut tamatta assigiinngillat, ilai angajoqqaatik tamarmik ineqatigivaat, ilai anaanartik ataatartilluuniit kisiat ineqatigalugu. Ilaalu angajoqqaatik najugaqatiginngilaat. Meeqqat tamatta inooriaatsigut assigiinngeqaat, tamattalu kinaasusserput assigineqanngilaq tamannalu tulluusimaarutigisartigu, allanimmi asseqanngilagut.
Kinaagaluarutta tamatta naleqarpugut.
Qujanaq
Nakuusaaqqamut soqutiginnittoqaruni uunga saaffiginnittoqarsinnaavoq
Mail: nakuusa@kujalleq.gl oqarasuaat: +299 64 53 16