Meerannguit tamaavissi meeqqat ulluanni pilluangaaritsi!

Meeqqat ulluat 1. juni 2023.

Meerannguit tamaavissi meeqqat ulluanni pilluangaaritsi!
Ullumi ulloq ilissi meerannguit ullorivarsi. Uagut inersimasut, meeqqat ilissi pillusi, allatulaaq iliorluta, sammisaqaqatigissavassi. Allatulaaq iliorluta sammisaqatigissavassi asagassi, nuannarigassi ajunngitsumillu inuuneqarnissarsi nuannersunillu misigisaqalaarnissarsi tunissutigerusukkatsigu. Taamaattumik ullumikkut ulloq nuannerluassasoq assorujussuaq kissaatigaara.

Taalliortoqartarpoq aamma erinniortoqartarpoq inuunermi misigisat suulluunniit pillugit, erinarsuusiat.
Taalliortut ilaat Jonathan Petersen, qiimaneq pillugu, taalliorlunilu erinniorsimavoq nuannersorujussuarmik. Versi siulleq imaappoq:

”Qiimalluta erinarsorniarta,
meeqqap nipaanik nuannersumik,
qiimasumimmi inuuseqarutta,
allissaqaagut mikinngitsumik.”

Qiimaneq meeqqat inuuneranni pingaaruteqartorujussuuvoq. Qiimagaangatta, suulluunniit nuannernerusutut ittarput. Ilaanni nuannaartarpugut, ilaanni qiasarpugut aamma ilaanni narrattarpugut, taavalu ilaanni qiimalluartaqaluta.

Misigissutsit amerlapput, suugaluarpataluunniit ajunngilaq.
Qiagutta narrakkutta ajuuingilaq. Qiasassuugut aamma narraqqasinnaavugut. Narrattoqarpat, qiasoqarpat, oqartassuugut: Ajunngilaq qianiarit imaluuniit ajunngilaq narraqqasinnaavutit. Taava inersimasup meeraq narraqqasoq imaluuniit qiasoq tusarnaaffaarillugu, akueralugu paarissavaa, nuannaaleqqikkiartussaarlu.

Meeqqat tamaavimmik, aamma inuit tamaavimmik, pisariaqartittarpaat arlaanik nuannersumik nuanninngitsumilluuniit misigisaqaraangamik, paasineqarnissartik.

Misigissutsit ilaat nuannerpiarneq ajorput kisianni aamma misigissutsit ilaat nuannersorujussuupput, soorlu: Qiimaneq.

Qiimagaangatta, nuannataaraangatta imaluunniit nuannakalaaraangatta suut tamarmik sapernannginnerusutut ittarput.

Qiimalluta arpakkaangatta, soorlumi oqilanerusartugut. Illaraangatta soorlumi illarnerusartugut. Imermik imeraangatta, soorlu imigarput mamarnerusartoq. Tassa qiimalluta arlaanik sugaangatta, soorlu qanoq iliornigut tamarmik pitsaanerusartut.

Taamaattumik ullumi meeqqat ullussinni nuannataarlusi, ilorrisimaarlusi, qungussutaarlusilu ulloq inuulluataarlusi pilluataarlusilu atussagissi kissaatingaarpassi.

Taava naggataatigut ullumikkumut aamma tulluartumik erinarsoqatigilaassavassi. Ateqarpoq ”Qiimaneq.”
Talliortua erinniortualu eqqaamannginnakku kinaasoq, taalliortua erinniortualu ataqqillugu, imaluunniit ataqqillugit, qujassutigalugu nuannersumik taallamik erinnamillu sanasimanerat, atussavarput, qiimaneq.

1.
Qiimaneq nassarneqarnerluni, qiimaneq nassarneqarnerluni, qiimaneq nassarneqarnerluni. Qiimaneq qiimaneq nuanneqaaq.

2.
Aap pigaarput taamakkerluta, aap pigaarput taamakkerluta, aap pigaarput taamakkerluta. Qiimaneq, qiimaneq nuanneqaaq.

Meeqqat ullussinni pilluakulooritsi! Ullorsilu nuannerluarili.

Bibi Kielsen, Ilinniartitaanermik inerisaanermillu ataatsimiititaliap siulittaasua.